<blockquote class="wp-block-quote is-layout-flow wp-block-quote-is-layout-flow"> <p>Монгол Улсын Ерөнхийлөгч Ухнаагийн Хүрэлсүх Оюутолгойн гүний уурхайд ажиллалаа.</p> </blockquote> <p>“Оюутолгой” ХХК 2022 онд гүний уурхай нээж, өнгөрсөн онд 124 дэх хүдэр буулгуурын тэсэлгээ хийсэн байна. 2025 онд уурхайн олборлолт өмнөх оноос 50 хувиар нэмэгдэн, зэсийн баяжмалын үйлдвэрлэл өсжээ.</p> <p>2028-2030 онд гүний болон ил уурхайгаас жилд дунджаар 500 мянган тн зэс үйлдвэрлэх төлөвтэй байна.</p> <blockquote class="wp-block-quote is-layout-flow wp-block-quote-is-layout-flow"> <p>Өөрөөр хэлбэл оргил үедээ өдөрт 17,000 цахилгаан автомашин үйлдвэрлэх хэмжээний зэс үйлдвэрлэдэг Дэлхийн дөрөв дэх том зэсийн уурхай болох юм.</p> </blockquote> <p>1,300 метрийн гүнд Дэлхийд тэргүүлэх бүтээн байгуулалт амжилттай хийсэн монгол залуус, гадаадын мэргэжилтнүүдэд Ерөнхийлөгч У.Хүрэлсүх талархал илэрхийллээ. Энэ бүтээн байгуулалт уул уурхайн салбарт сайн жишиг болон хөгжинө гэдэгт итгэлтэй байгаагаа хэлэв.</p> <figure class="wp-block-image size-full"><img loading="lazy" decoding="async" width="1024" height="683" src="https://admin.time.mn/wp-content/uploads/2025/03/received_529891673077419-1024x683-1.jpeg" alt="" class="wp-image-86047" srcset="https://admin.time.mn/wp-content/uploads/2025/03/received_529891673077419-1024x683-1.jpeg 1024w, https://admin.time.mn/wp-content/uploads/2025/03/received_529891673077419-1024x683-1-300x200.jpeg 300w, https://admin.time.mn/wp-content/uploads/2025/03/received_529891673077419-1024x683-1-768x512.jpeg 768w" sizes="auto, (max-width: 1024px) 100vw, 1024px" /></figure> <p>Оюутолгойн уурхайн үйлдвэрлэл, олборлолт жилээс жилд нэмэгдэж байгаа бөгөөд Дэлхийд тэргүүлэх өндөр технологи нэвтрүүлэн, аюулгүй ажиллагааг бүрэн ханган ажиллаж байгаа нь уурхайн нийт хамт олны хүч хөдөлмөр, хүчин зүтгэл гэдгийг онцоллоо. Цаашид илүү олон аж ахуйн нэгж, иргэн, баялаг бүтээгчтэй хамтран ажиллаж, тэдний бизнесийг дэмжинэ гэдэгт итгэж байгаагаа илэрхийллээ.</p> <figure class="wp-block-image size-full"><img loading="lazy" decoding="async" width="1024" height="683" src="https://admin.time.mn/wp-content/uploads/2025/03/received_629074089883043-1024x683-1.jpeg" alt="" class="wp-image-86045" srcset="https://admin.time.mn/wp-content/uploads/2025/03/received_629074089883043-1024x683-1.jpeg 1024w, https://admin.time.mn/wp-content/uploads/2025/03/received_629074089883043-1024x683-1-300x200.jpeg 300w, https://admin.time.mn/wp-content/uploads/2025/03/received_629074089883043-1024x683-1-768x512.jpeg 768w" sizes="auto, (max-width: 1024px) 100vw, 1024px" /></figure> <p>“Рио тинто” группийн гүйцэтгэх захирал Якоб Стаусхолм, Оюутолгойн ордоос олборлож байгаа зэс, ногоон хөгжилд Монгол Улсын оруулж байгаа хувь нэмэр. Энд үйлдвэрлэсэн зэсийн баяжмал Дэлхий дахинд салхин сэнс, цахилгаан тээврийн хэрэгсэл, сэргээгдэх эрчим хүчний дэд бүтцийн амин чухал орц гэдгийг хэллээ.</p> <p>“Рио тинто” групп Оюутолгойд 2023 оны байдлаар 17 орчим тэрбум ам.долларын хөрөнгө оруулаад байна. 2010 оноос хойш 12 их наяд төгрөгийн татвар төлсөн. 2024 оны дөрөвдүгээр улиралд 1,000 гаруй аж ахуйн нэгжтэй хамтран ажиллаж, нэг их наяд төгрөгийн худалдан авалт хийжээ.</p> <p>Өмнөговь аймагт гэхэд л 2010 оноос хойш 4.9 их наяд төгрөгийн бараа үйлчилгээ авч, 354 төсөлд 187 тэрбум төгрөгийн санхүүжилт олгосон. Мөн &#8220;Ханбогдын хөгжлийг дэмжих хурдасгуур сан&#8221; байгуулан 170 тэрбум төгрөгийн хөрөнгө оруулж байна.</p> <p>Оюутолгойд 20 гаруй мянган хүн ажиллаж байгаагийн 97 хувь нь монголчууд. Үүнээс 25 хувь нь Өмнөговь аймгийн иргэд юм. Нийт ажилчдын 23 хувь нь эмэгтэйчүүд бөгөөд ирэх 10 жилд энэ тоог 50 хувьд хүргэхээр төлөвлөжээ.</p> <p>2014-2024 оны байдлаар &#8220;Оюутолгой&#8221; төсөл манай улсын нийт экспортын орлогын 17 орчим хувь, эрдэс бүтээгдэхүүний экспортын 20 хувь, гадаад валютын нөөцийн 44 хувийг бүрдүүлсэн байна. 2024-2051 онд энэ төслөөс манай улсын хүртэх нийт өгөөж 11.9 тэрбум ам.доллар болох юм.</p> <p>Тус компани “Өмнийн говийн гүний уурхайн институт” байгуулж, уул уурхайн салбарын Дэлхийд өрсөлдөх чадвартай, дотоод, гадаадын боловсон хүчин бэлтгэж эхэлжээ.</p>