Жижиг, дунд үйлдвэр хөгжүүлэх сангийн 2025 оны төсвийн 30-аад хувийг өнөө жил төвийн бүсэд зарцуулахаар төлөвлөжээ. Өнөө жил тус сангийн хөнгөлөлттэй зээлийн хэмжээ эрс нэмэгдэж, Дархан-Уул аймагт 10.5 тэрбум, Сэлэнгэд 8 тэрбум, Төв аймагт 8 тэрбум гаруй төгрөгийн санхүүжилт хуваарилжээ. Өмнө нь тус сангийн зээлийг бүх аймагт тэнцүү хуваарилдаг байсан аж. Ингэхэд 1 аймагт 1 тэрбум төгрөг ногддог байв. Энэ нь үр дүн багатай байсан тул өнөө жилээс хуваарилалтыг өөрчилжээ.

Улсын хэмжээнд жижиг, дунд үйлдвэрлэгчид ЖДҮХС-д нийт 534 төсөл ирүүлснээс 319-ийг нь хүлээн авчээ. Дарханы жижиг, дунд үйлдвэрлэгчид 15 тэрбум төгрөгийн 94 төсөл, Сэлэнгэ, Төв аймгийнхан 16 тэрбум төгрөгийн нийт 111 төсөл анхан шатанд шалгарсан байна. Үүнээс Дарханы үйлдвэрлэгчдийн 10.5 тэрбум төгрөгийн 64 төсөлд нарийвчилсан үнэлгээ хийж байна. 

ХХААХҮ-ийн сайдын А/35, 36, 37-р тушаалаар Дархан, Төв, Сэлэнгэ аймгийн жижиг, дунд үйлдвэрлэгчдэд тус сангаас зээл олгох ерөнхий нөхцөлийг баталсан байна. Зээлийн төсөл, хүсэлт, бичиг баримтыг 2-р сарын 10-наас 3-р сарын 12-ны хооронд хүлээн авчээ.

Одоо жижиг, дунд үйлдвэрлэгчдийн ажлын байранд нь очин үнэлгээ хийж буй аж. Үйл ажиллагаа эхэлсэн эсэхийг шалгаж, төсөл нь хэр хэрэгжих боломжтойг үүгээр  тодорхойлно. Барьцаа хөрөнгийг нь үнэлнэ. Аймгуудад байгуулсан сонгон шалгаруулах дэд хороо дараагийн шатны, нарийвчилсан үнэлгээг хийж, орон нутгаас баримталж буй бодлогод уг төсөл нийцэж буй эсэхийг нягтлах юм байна. Өмнө нь төслийн сонгон шалгаруулалтыг хаалттай явуулдаг байсан бол одоо дэд хороо сонгон шалгаруулалтаа олон нийтийн хяналтад, нээлттэй явуулж байна. Энэ 7 хоногт нарийвчилсан үнэлгээ хийж дуусна.

ЖДҮХС-гаас өнөө жил олгох зээл 5 жилийн хугацаатай, жилийн 5%-ийн хүүтэй, эхний 1 жилд үндсэн төлбөрөөс чөлөөлнө.