“Одмөндөр” шинжлэх ухаан, танин мэдэхүйн суваг гүйцэтгэх захирлын суудалдаа сэлгээ оруулж, эмэгтэй удирдлагатай болжээ. Өнгө төрх, нийтлэлийнхээ бодлогоор бусад хэвлэл мэдээллийн сувгуудаас эрс ялгардаг “Одмөндөр”-ийн шинэхэн захирал Ганбаатарын Мөнхзултай ярилцлаа.

-“Одмөндөр”-ийн шинэхэн захирал Г.Мөнхзул гэж хэн бэ?

-Хүн ер нь маш олон ондоошилтой. Олон зүйлээр тодорхойлж болно. Эмэгтэй хүн, ээж, охин, Монгол Улсын иргэн гээд олон талаас нь харж болно. Өнөөдрийн тухайд би өөрийгөө шинжлэх ухаан, танин мэдэхүйн “Одмөндөр” сувгийн захирал гэж тодорхойлно.

-“Одмөндөр” сувгийг үүсгэн байгуулагч Зандаа удирддаг байсан. Чухам яагаад солигдох болов?

-Зандааг зүрх сэтгэлийнх нь дуудлага дуудсан. Тэрээр өөрийгөө Дэлхийг харийнхнаас аврах ёстой гэж бодож байгаа. Үүний тулд күнфү мастер болох шаардлагатай гэж итгээд байгаа юм. Зандаа күнфү мастер болохоос гадна уран бүтээлдээ илүү төвлөрч, бүтээлч ажиллахдаа анхаарахаар болсон. Гэхдээ хамгийн чухал нь күнфү мастер болох юм гэнэ лээ.

-Удирдлага солигдсоноор “Одмөндөр”-ийн яг юу өөрчлөгдөх вэ?

-“Одмөндөр” маш өвөрмөц бүтэцтэй байгууллага. Маш олон салбарын мэргэжилтнүүд бий. Үүнийгээ дагаад олон төрлийн харилцаа “Одмөндөр”-т үүсдэг. Хүйсийн хувьд эмэгтэй хүнд ч давуу тал байна, эрэгтэй хүнд ч давуу тал бий. Эмэгтэй хүний хувьд илүү их детальд анхаардаг учраас эмэгтэй захиралтай болъё гэдэгт бид санал нэгдсэн. “Одмөндөр” компани байгуулагдаад 1 жил болж байна. Нярай үедээ байгаа гэж ойлгож болно. Хүүхдийн хөгжлөөр бодоход, хөлд ороогүй үе шүү дээ. Цаашдаа мөлхөнө, хөлд орно, хөл дээрээ бат зогсдог болно. Байгууллагын бүтэц, суурь нь бат бөх байж, урт удаан хугацаанд амжилттай оршин тогтноно гэж итгэж байгаа.

-“Одмөндөр”-ийн захирлаар ажиллах санал хэзээ гарсан бэ?

-Жилийн өмнө ийм санал ирж байсан. Тухайн үед би “Одмөндөр”-ийн 1 хэсэг болоод удаагүй байсан. “Бурхдын домог” гээд  соёлын чиглэлийн нэвтрүүлэг хийж эхэлж байсан үе л дээ. Мэдээж хамт олон таалагдсан. Миний хувьд Зандаатай багын найз. Түүний бусад найзтай танилцаад, байгууллагынх нь зорилго таалагдсан учраас бүтэн 8-9 сар бодсоны эцэст саналыг нь хүлээж авсан. Бүтэн цагаар ажиллах боломжтой юм байна, ажил ,туршлагын хувьд “Одмөндөр”-т миний хийж чадах зүйл байна, хувь нэмрээ оруулах боломж байна гэж үзээд зөвшөөрсөн л дөө.

-Г.Мөнхзул гэдэг хүн удирдах чиглэлээр хэр туршлагатай вэ?

-Би банкны салбарт 10 гаруй жил удирдах албан тушаалд ажилласан. Банкны харилцагчийн үйлчилгээ, VIP салбар, хувийн банкны салбарыг удирдаж байсан туршлага бий. Би банкны салбарт ажиллаж байхдаа өөрийгөө банкир биш гэж боддог байсан. Харин өөр салбарт ажиллахдаа банкны салбар надад ямар их өгөөжтэй байсныг, хэчнээн их зүйл ойлгуулсныг, намайг чадавхжуулсныг ойлгосон. Банкны салбартаа маш их хайртай.

– Банканд 10 гаруй жил ажилласан хүн шууд радиод ороод ирж. Эдийн засгийн боломж талаасаа ч банктай харьцуулшгүй л байгаа байх, таны одоогийн ажил. Сонголт их сонин байна.

-Банк маш хариуцлагатай салбар. Том институт. “Одмөндөр”-ийн хувьд чадварлаг хүмүүс нь байгаа. Институт нь өөрөө чадвартай болох нь чухал. Тэнгэр, газар шиг ялгаатай. Гэхдээ их ажлаас айхгүй байна.

-“Одмөндөр” гэж ер нь юу гэсэн үг юм бэ?

-Нэрийн утгыг би мэдэхгүй. Зандаа юу бодож% энэ нэрийг өгснийг мэдэхгүй. Асууж үзээгүй. Гэхдээ монгол хэлээр аялгуу эгшигтэй сонсогдож байна. Од, мөндөр аль аль нь байгалийн үзэгдэл. Аливаа зүйлийг танин мэдэхдээ хүн сониучирхан хардаг, сонсдог байх. “Одмөндөр” өөрөө танин мэдэхүйн зорилготой. Магадгүй энэ талаараа холбогддог байх гэж бодож байна. Миний хувьд “Одмөндөр” бол гайхалтай сонирхолтой хүмүүсийн нэгдэл. Би энэ нэгдлийг улам том болгохыг, илүү хүчтэй болгохыг зорьж байна.

-Соёл судлаач мэргэжилтэй, банкны салбарт урт удаан хугацааны туршлага хуримтлуулсан хүн одоо радиогийн зах зээл рүү орж ирнэ гэдэг хоорондоо авцалдахгүй л харагдаад байх юм.

-Хүн хүссэн зүйлээ хийхэд заавал тухайн салбарын мэргэжилтэн байх шаардлагагүй гэж боддог. Би МУИС-ийн Гадаад хэл, соёлын сургуулийг слав судлаачаар төгссөн. Болгарт Европын холбоо судлалаар магистрын зэрэг хамгаалсан. Гадаад судлал, соёл судлал, түүх талдаа мэргэшсэн. Гэхдээ би Монголд эргэж ирээд, байгаль хамгаалах олон улсын байгууллагад хамтын ажиллагааны зохицуулагчаар ажиллаж байсан. Соёл судлалын суурьтай байсан минь надад олон төрлийн салбарт ажиллах зөөлөн арга барил буюу soft skill бий болгох хөшүүрэг болжээ. Би энэ чадварынхаа хүчээр л өөрийнхөө карьерыг бүтээж ирсэн.

-“Одмөндөр” маш их судалгаатай 700 нэвтрүүлэг гаргасан гэсэн. Энэ бүх нэвтрүүлэг үр ашигтай эсвэл гаргасан зардлаа нөхөж чадаагүй байх. Хэвлэл мэдээллийн салбар дангаараа орлого санхүүжилтээ шийднэ гэдэг амаргүй болсон үе шүү дээ?

-Аливаа байгууллагын зорилго нь мөнгө олох болоод ирвэл бурууддаг. Хийж байгаа зүйлээ чанартай хийхэд л бизнесийн амжилт нь дагаад ирнэ гэдэгт итгэлтэй явдаг.

-Та ажлаа юунаас эхлэх вэ?

-Хамгийн түрүүнд би байгууллагын бүтэц, зохион байгуулалтыг өөрчилнө. Үүнийгээ би ажлаа авахдаа хэлсэн. Яг л эмэгтэй хүн гэртээ ороод л гэрээ цэвэрлэдэг шиг. Монгол хүний “Биеэ засаад, гэрээ зас. Гэрээ засаад, төрөө зас” гэж үг байдаг даа. Яг түүн шиг байгууллагынхаа дотоод үйл ажиллагааг цэгцтэй болгож, ажилтнуудынхаа ажиллах орчныг таатай болгоход анхаарна. Үүний дараа тэднээс авч болох бүтээлч санаа, бүтээлч ажиллагааг илүү нэмэгдүүлэх боломжтой гэж хардаг.

-“Одмөндөр”-ийн удирдлага солигдсоноор нэвтрүүлгийн агуулгуудад өөрчлөлт орох уу?

– Бид жил жилээр хөтөлбөрөө баталдаг. Өнгөрсөн 2024-2025 оны хөтөлбөр маань 7-р сард дуусна. Бараг шувтарч байна. Энэ хөтөлбөрөө дуусгаад, бид 14 хоног амраад, дараагийн уран бүтээлийнхээ жилийн ажлыг төлөвлөнө. Хөтөлбөрийн агуулгууд эхнээсээ гараад эхэлж байгаа. Эхний жилийн агуулгууд байх хэдий ч илүү сонирхолтой болгох чиглэлд анхаарна.

– Одмөндөр хэдэн эмэгтэй хөтлөгчтэй вэ?

-5 эмэгтэй хөтлөгчтэй.

-Хүйсийн харьцаа яагаад ийм тэнцвэргүй байна вэ?

-Бид санаатайгаар хүйсийн харилцааг ингэж тогтоогоогүй. “Одмөндөр” шинжлэх ухаан, танин мэдэхүйд дуртай найзуудын нэгдэл. Бидний мэдэж байгаа зүйл туйлын зөв биш байж болно. Бидний мэдлэг хамгийн өндөр мэдлэг биш ч байж болно. Бид танин мэдэхүйд дуртай. Дуртай зүйлээ бусадтай хуваалцах дуртай хүмүүс. Сайн дурын үндсэн дээр бүрэлдсэн нэгдэл. Тийм учраас бидэнд хүйс хамаагүй. Цаашид шинжлэх ухаанч мундаг эмэгтэйчүүдээр хүрээллээ илүү тэлэх байх гэж бодож байна.