Ерөнхий боловсролын сургуулийн II улирлын бие даалтын 7 хоногт сурагчдад “Аюулгүй амьдрах ухаан” сургалтын хөтөлбөрийн хүрээнд амьдрах ухааны мэдлэг олгох, чадвар эзэмшүүлэхэд Боловсролын яам анхаарч байна. Энэ чиглэлээр ОБЕГ-ын харьяа Гамшгаас хамгаалах сургалтын төв буюу 116 дугаар ангид өнөөдрөөс сурагчид гамшиг, ослоос өөрийгөө болон бусдыг аврах, хамгаалах мэдлэг олгох сургалтад хамрагдаж эхэллээ.

Өнөөдөр үдээс өмнө 77, 90 сургуулийн 135 сурагч Гамшгаас хамгаалах сургалтын төвд ирж, гамшиг, ослын талаар ойлголттой боллоо. 14:00 цагаас мөн 135 сурагчид ийм мэдлэг олголоо. Энэ 7 хоногт нийслэлийн сургуулийн сурагчдыг уг сургалтад хамруулна.

Тус төв Аюулгүй байдлын танхим, Виртуал сургалтын танхим, Галын аюулгүй байдлын танхим, Эмнэлгийн анхан шатны боловсролын танхим, Утаат орчны танхим, Газар хөдлөлтийн танхимтай. Утаат орчны танхимд сурагчид гал, түймрийн аюулыг мэдэрч, түүнээс яаж хамгаалах анхан шатны мэдлэгтэй болсон бол Газар хөдлөлтийн танхимд 1-8 баллын чичирхийллийг биеэр мэдэрч, газар хөдөлсөн үед яах ёстойг мэдэж авлаа. Эдгээр танхим тухайн аюулыг хиймлээр үүсгэж, хүнд бодит мэт мэдрүүлдэг. Энэ нь аюул, гамшгийн тухай бодит ойлголт өгдөг юм.