Улсын дээд шүүхээс гэмт буруутай гэж тогтоосон УИХ-ын гишүүн Даваагийн Цогтбаатарыг эргүүлэн татах хууль зүйн үндэслэл бүрдсэн. Гэвч хэн хэрхэн эргүүлэн татах тухай асуудал одоогоор тодорхой биш байна. Харин их хуралд цаашид суух уу үгүй юу нь гэдэг нь яригдаж байгаа Д.Цогтбаатар гишүүн Улсын дээд шүүхийн шийдвэрт гомдолтой байгааг Ерөнхий шүүгчид мэдүүлжээ. Энэ талаараа тэрээр сэтгүүлчдийн асуултад хариуллаа.

– Та шүүхийн шийдвэрийг очиж авсан хирнээ яагаад биелүүлэхгүй байна вэ?

– Надад хууль өөрөөр үйлчилсэн учраас дээд шүүхийн шийдвэрийг очиж авсан. Шийдвэрийг Дээд шүүхээс очиж авсан нь шийдвэрийг хүлээн зөвшөөрсөн гэсэн үг биш. Үндсэн хуульд хүний сонгох сонгогдох эрхийн тухай болоод хүний сонгог сонгогдох эрхийн тухай дурдсан байдаг. Үндсэн хууль зөрчсөн, өргөсөн тангаргаасаа няцсан хүнийг эргүүлэн татах тухай Үндсэн хуульд заасан байгаа. Үндсэн хуулийг цэц, бусад хуулийг дээд шүүх тайлбарладаг. Түүнээс биш дуртай 1 хуульч, сэтгүүлчид ямар 1 өнцөг гаргаж 3 байгаа өгүүлбэрийг 2 болгож уншиж тайлбарлах эрх байхгүй гэдгийг хэлье.

-Үндсэн хуулийн 29.3 -ийг та юу гэж тайлбарлах вэ?

-Та нар өөрсдөө Үндсэн хуулийг унш

-Үндсэн хуулинд УИХ-ын гишүүн гэмт хэрэг үйлдсэн бол УИХ түүнийг эргүүлэн татна гэж заасан байна. Улсын дээд шүүхийн шийдвэр эцсийнх байна. Заавал биелүүлнэ гэж мөн заасан байдаг. Дээд шүүх шийдвэрээ гаргасан. Та шүүхийн шийдвэрийг тайлбарлаад байж болох уу?

-Би ойлгомжтойгоор хэллээ. УИХ-ын гишүүн гэж хэн бэ гэдгийг Үндсэн хууль болоод бусад хуульд заасан байгааг.

-УИХ-ын гишүүнд хариуцлага тооцох эргүүлэн татахыг ч заасан байна.

-Гишүүн болоод би үндсэн хууль зөрчөөгүй. Өмнө нь ч би үндсэн хууль зөрчөөгүй.

-Та 20 сая төгрөгийнхөө торгуулийг төлөө юү?

-Би шүүхийн шатанд ахиад гомдол гаргаж байгаа.

-Аль шүүхийн шатанд гомдол гаргасан юм бол?

-Хуулинд биччихсэн байгаа.

-Ерөнхий шүүгчид үү?

-Тиймээ

-Дээд шүүхийн шийдвэр гараад 70 гаруй хоног өнгөрлөө. Шүүхийн шийдвэртэй холбоотой бичиг ирсэн үү?

-Ирээгүй.

-Та хууль биелүүлэх үүрэгтэй шүү дээ

-Би хууль тайлбарлах гээгүй ээ

-Та өөрт ашигтай заалтыг тайлбарлаад бусад заалтыг нь ярихгүй байна шүү дээ

-Би хэллээ шүү дээ. Үндсэн хуульд сонгох сонгогдох эрх гэж бий. Түүний дагуу би цагдаа шүүх хууль хяналтын бүх байгууллагаас баримт материалаа бүрдүүлж өгөөд нэр дэвшсэн. Би жагсаалтаар сонгогдоогүй. Би хангайн бүсийн 1-р тойрогт нэр дэвшээд сонгогдсон. Гишүүн болсноос хойш үндсэн хууль зөрчөөгүй, өмнө нь ч зөрчөөгүй.

-Таныг гишүүн болж нэр дэвшихдээ хууль зөрчсөн гэдэг асуудал л яригдаад байгаа шүү дээ

-Иргэнийг биш гишүүнийг гэдэг үг наад заалтад чинь байгаа байхгүй юу? За би тайлбараа өглөө

-Баярлалаа