Саудын Арабын нийслэл Эр Рияд хотноо 24-ний даваа гарагт явагдсан Америк, Оросын дипломат төлөөлөгчдийн Украины дайны асуудлаарх яриа хэлэлцээ өндөрлөж, улмаар талууд 25-ны мягмар гарагт хамтарсан мэдэгдэл гаргахаар болжээ.
Энэ удаагийн ээлжит яриа хэлэлцээний үеэр Хар тэнгист гал зогсоох тухай асуудлыг хэлэлцэх болно хэмээн Д.Трампын Ойрхи Дорнодын асуудал хариуцсан элч төлөөлөгч Стив Уиткофф өнгөрсөн ням гарагт Fox News телевизэд өгсөн ярилцлагадаа онцолж байсан юм.
Түүнчлэн өнгөрсөн долоо хоногийн мягмар гарагт АНУ, ОХУ-ын төрийн тэргүүд утсаар хийсэн хэлэлцээний үеэрээ Хар тэнгист гал зогсоох талаар ярилцаж, улмаар Хар тэнгисээр улаан буудай тээвэрлэх санаачлагыг дахин эхлүүлэх асуудлыг ийнхүү энэ удаагийн техникийн уулзалтаар ярилцаад байна.
Анх 2022 онд Турк болон НҮБ-ын зуучилснаар эхлүүлж байсан Хар тэнгисээр улаан буудай аюулгүй нэвтрүүлж тээвэрлэх санаачлага бүхий хэлэлцээрээс 2023 онд ОХУ гарсан бөгөөд үүнийхээ шалтгааныг тайлбарлахдаа Оросын экспортод тавьсан хоригоо зөөллөж, цуцлаагүй хэмээн барууны орнуудыг буруутгаж байсан билээ.
ОХУ-ын төлөөлөгчдийн багийг тус улсын парламентын дээд танхим буюу Холбооны зөвлөлийн ОУ-ын асуудал хариуцсан хорооны дарга Григорий Карасин, ОХУ-ын Холбооны аюулгүй байдлын албаны даргын зөвлөх Сергей Беседа нар тэргүүлэн оролцсон бол АНУ-ын төлөөлөгчдийн багт Төрийн департаментын бодлого төлөвлөлтийн дарга Майкл Антон багтсан байна.
Хоёр талын ажлын түвшний яриа хэлэлцээний тухай олон улсын хэвлэлүүдэд бичсэнээр уулзалт Эр Рияд хотын тансаг зэрэглэлийн зочид буудалд 12 цаг гаруй хугацаанд үргэлжилсэн бөгөөд хамтарсан мэдэгдэл гаргахаар болсон байна.
Түүнчлэн Оросын ГХЯ-ны хэвлэлийн төлөөлөгч М.Захарова 24-нд нийгмийн сүлжээнд хийсэн мэдэгдэлдээ ОХУ-ын гадаад хэргийн сайд Сергей Лавров мягмар гарагт хэвлэлийнхэнд өгөх ярилцлагадаа энэ удаагийн Орос-Америкийн хэлэлцээний зарим агуулгын талаар ярина гэжээ.
Түүнчлэн олон улсын хэвлэлүүд болон Украины ерөнхийлөгч В.Зеленскийн мэдэгдсэнээр мягмар гарагт Украин, Америкийн төлөөлөгчид Саудын Араб улсад дахин хэлэлцээ хийхээр болсон ба үүнийг ажиглагчид Украины дайныг зогсоох үйл явцад ахиц дэвшил гарч байгаагийн дохио хэмээн үзээд байна.
Гэвч Кремлийн зүгээс хүлээлтээс доогуур байр суурийг илэрхийлсээр байгаа юм. Кремлийн хэвлэлийн төлөөлөгч Д.Песков ням гарагт хэлэхдээ, “бид дайныг зогсоох замынхаа дөнгөж гараан дээр явж байна, биднийг маш хүнд яриа хэлэлцээнүүд хүлээж байна” гэжээ.
Америк, Оросын яриа хэлэлцээний үеэр Украины зүүн хойд нутгийн Суми хотын орон сууцны болон сургуулийн барилгуудад үзүүлсэн Оросын пуужингийн цохилтын улмаас 90 орчим хүн бэртэж гэмтсэний 17 нь хүүхдүүд байсныг Украины ерөнхийлөгч В.Зеленский мэдэгджээ.