Өнгөрсөн долоо хоногт нээлтээ хийсэн Disney компанийн “Цасан гуа” кино Хойд Америкийн кинотеатруудаас олсон орлогоороо тэргүүлсэн байна.

Disney компанийн 1937 онд гарч байсан сонгодог бүтээл болох “Цасан гуа ба долоон одой” хүүхэлдэйн киноны шинэ хувилбар болон гарч байгаа уг уран сайхны кино нээлтээ хийхээсээ өмнө ихэвчлэн сөрөг шүүмжлэлийн бай болж байсан боловч ийнхүү ашиг орлогоороо тэргүүлжээ.

Шүүмжлэгчид киноны гол дүр болох Цасан гуад тоглосон Колумб гаралтай жүжигчин Рэйчел Зеглерийн сонголтыг шүүмжлэхээс гадна бодит жүжигчид тоглосон уран сайхны кинонд долоо одойн дүрийг CGI буюу компьютер графикаар бүтээсэн явдлыг нь хурцаар шүүмжилсэн юм.

Түүнчлэн Израил-Хамасын дайны асуудлыг хүртэл сөхөж, гол дүрийн жүжигчин Рэйчел Зеглерын Палестиныг дэмжсэн мэдэгдлүүд болон киноны эсрэг дүр болох хорон санаат хатанд тоглосон Израилын жүжигчин Гал Гадотын Израилыг дэмжсэн мэдэгдлүүдийг ч харьцуулаад амжсан билээ. 

“Цасан гуа” кино нээлтийн долоо хоногтоо олон улсын хэмжээнд нийт 87.3 сая ам.долларын орлого олсны бараг тал нь Хойд Америкийн кинотеатруудаас олсон орлого болохыг Box Office Mojo вебсайт мэдээллээ.

Гэхдээ нийт 270 сая ам.долларын өртгөөр бүтсэн киноны хувьд нээлтийн долоо хоногийн ашиг орлогын хэмжээ хүлээлтээс доогуур байсныг онцолсон байна.

1.4 тэрбум хүн амтай БНХАУ-д “Цасан гуа” кино нээлтийн долоо хоногтоо 1 сая ам.долларын орлого олсон нь чамлалттай, маш муу үзүүлэлт болсныг мөн салбарын мэргэжилтнүүд хэлж байна.

“Цасан гуа” кино Rotten Tomatoes кино шүүмжийн вебсайтад одоогийн байдлаар ердөө 44%-ийн үнэлгээ аваад байна.