Цаг уурын байгууллагын ирүүлсэн мэдээгээр Говь-Алтай аймгийн Бугат суманд салхины хурд түр зуур секундэд 37 метрт хүрч, гамшигт үзэгдэл болж байна. Говь-Алтай, Ховд, Баян-Өлгий, Завхан, Баянхонгор аймгийн нутгаар хүчтэй салхи, орон шуурганы цаг агаарын аюултай үзэгдэл ажиглагдаж байна.

Салхины дундаж хурд баруун аймгуудын нутгаар 9-14 м/с, зарим үед 20-37 м/с хүрч, цаг агаарын гамшигт үзэгдлийн хэмжээнд хүрч байгаа аж.

Салхины хурд ойт хээр, уулархаг нутагт 24 м/с, тал хээр, говьд 28 м/с хүрвэл гамшигт үзэгдэл гэж үздэг. Гэтэл Говь-Алтайн Бугат суманд 37 м/с хүрчээ. Ийм хүчтэй салхи ямар хугацаанд үргэлжлэх нь хамаагүй. Ганц секунд байсан ч гамшигт үзэгдэл гэж тооцдог.