Монголын говиос маш ховор, нэг мөчиндөө хоёр сарвуутай үлэггүрвэлийн шинэ төрөл, зүйлийг олон улсын палеонтологич эрдэмтдийн баг нээж илрүүлсэн талаар BBC агентлаг мэдээллээ. Энэхүү үлэггүрвэл хойд хоёр хөл дээрээ зогсож явдаг, нэг мөчиндөө гурван сарвуутай теризинозавр хэмээх үлэггүрвэлийн бүлэгт багтах шинэ төрөл, зүйл болохыг тогтоожээ.

Уг шинэ төрөл, зүйлийн үлэггүрвэлийг Монгол Улсын ШУА-ийн Палеонтологийн хүрээлэнгийн захирал, доктор, дэд профессор Хишигжавын Цогтбаатарын нэрээр Duonychus tsogtbaatari хэмээн нэрлэсэн байна. Duonychus гэдэг нь грек хэлний “хоёр оронтой тоо” гэсэн утгатай үг юм.

Duonychus tsogtbaatari дундаж хэмжээтэй, ойролцоогоор 260 кг жинтэй үлэггүрвэл байсан аж. Эрдэмтэд энэхүү үлэггүрвэлийн урт, муруй хумс болон маш сайн нугардаг сарвуу нь мод, ургамлын мөчрийг чанга атгах зориулалттай байсан гэж үзэж байгаа юм. Түүнчлэн газар ухаж малтах эсвэл зэвсэг болгож ашиглах зориулалттай байсан байх магадлалтайг ч дурьджээ.

Мөн энэ үлэггүрвэлийн хумс гадуураа кератин агуулсан бүрээстэй. Теризинозаврын ийм хумстай анхны төрөл гэдгийг тогтоосон байна.

Уг цоо шинэ төрөл, зүйлийн үлэггүрвэлийн олдворыг Монголын говийн элсэн дэх 100-66 сая жилийн өмнөх Цэрдийн галавын хожуу үе буюу Баянширээ формацын (Өмнөговь аймаг) цаг үеийн олдворт газруудаас олсон байна.

ЮНЕСКО буюу НҮБ-ын Боловсрол, шинжлэх ухаан, соёлын байгууллага Монголын говийг Дэлхийн үлэггүрвэлийн чулуужсан олдворын хамгийн том сан хэмээн тодорхойлсон юм.