Хүүхэд, залуус бөөрний өвчин тусах нь ихсэж байна. Үүний шалтгаан, эмчилгээ, сэргийлэх аргын талаар Улсын хоёрдугаар төв эмнэлгийн бөөр, диализын эмч М.Болортуяатай ярилцлаа.

–Манай улсад бөөрний өвчин ямар түвшинд байна вэ? Бөөрний дутагдалд залуу хүмүүс орж байна гэдэг үнэн үү?
-Бөөрний дутагдалд орсон, өвчин нь эцсийн шатандаа хүрсэн хүн олширч байна. Манай улсад бөөрний өвчин ямар түвшинд байгааг, яагаад залуу хүн өвчлөөд байгааг судалсан нарийн судалгаа алга. Гэхдээ залуу хүмүүсийн бөөр өвчлөөд байгаа нь хотжилт, амьдралын хэв маяг өөрчлөгдсөн, хөдөлгөөн дутагдсан, таргалсан, чихрийн шижин ихэссэнтэй холбоотой гэж хэлж болно.
Ганцхан манай тасагт гэхэд диализын аппаратад байнга ордог хүмүүсийн 60-70 хувь чихрийн шижингээс болж, бөөрний дутагдалд орсон байна. Диализын аппаратад орно гэдэг нь бөөрний өвчин эцсийн шатанд орсон гэсэн үг. Ер нь нийтээрээ ийм байгаа даа.

–Бөөрний үрэвсэл, бөөрний дутагдал гэдэг нь хоёр өөр өвчин биз дээ? Хүмүүс хооронд нь андуураад байдаг юм шиг байна.
-Хүмүүс ихэвчлэн бөөр үрэвссэн гэж ярьдаг. Бөөр үрэвссэнээс болж, дутагдал орох уу гэж асуудаг. Тэгэхээр бөөрний үрэвсэл, бөөрний дутагдал гэдэг нь тусдаа өвчин. Үрэвсэл гэдэг нь бөөр, шээсний замын халдвар. Энэ өвчнийг нян үүсгэдэг. Дутагдал гэдэг нь бөөрний түүдгэнцрийн өвчин. Энэ бол бөөрний өвчнийг архаг түвшинд хүргэдэг зүйл. Зарим хүн бөөрний дутагдалд ороод, эцсийн шатандаа хүрээд ирдэг. Тэгснээ өөрийгөө “Бөөрний үрэвсэлтэй. Жилдээ 1-2 удаа антибиотик тариулчихдаг” гэсээр орж ирдэг. Гэтэл бөөрний архаг дутагдлыг антибиотик эмчилдэггүй.

–Манайхан дур мэдээд эм, тан их хэрэглэдэг. Гэтэл зарим нэг судалгаанд антибиотикийн буруу хэрэглээ бөөрний дутагдалд хүргэдэг гэсэн байна. Ийм байх боломжтой юу?
-Антибиотикийн буруу хэрэглээнээс бөөрний дутагдалд орно гэж байхгүй. Манай орны уур амьсгал, хүйтэн сэрүүн байдалтай холбоотой бөөр, шээсний замын халдвар их байдаг. Хүмүүс бөөр, шээсний замын халдвар, цистит тусах үед өөрсдөө дур мэдэн эмчилдэг. Дур мэдэн антибиотик ууснаар өвчнөө хүндрүүлэх, цаашлаад бөөрөө өвчлүүлж болно. Тэгэхээр таны биед ямар нэг шинж тэмдэг илэрсэн л бол эмнэлэгт хандах хэрэгтэй. Түүнээс биш хэн нэгэн хүний яриа, “Тэр сайн. Би энийг хэрэглээд зүгээр болсон” гэдэг үгэнд итгэж, дур мэдэн эмчилгээ хийж болохгүй. Хүн болгоны бие физиологи өөр, хүн болгонд таарах, тохирох эмчилгээ нь хүртэл тусдаа байгаа. Ядаж л гараад өрхийн эмнэлэгтээ үзүүлчих хэрэгтэй шүү дээ.

–Хоол хүнсний буруу хэрэглээ бөөр өвчлөхөд нөлөөлөх үү?
-Нөлөөлнө. Ялангуяа давс хэт их хэрэглэхээ хязгаарлах хэрэгтэй. Давс их хэрэглэснээр залуу хүн ч гэсэн даралт ихэсдэг болж байна. Энэ нь цаашлаад өвчин үүсгэх шалтгаан болно. 2-рт, манайхан шингэн маш бага уудаг. Өтгөн, сүүтэй цай, ундаа уучхаад шингэнээ нөхөж байна гэж ойлгодог. Үгүй шүү.

–Бөөрний өвчнөөс хэрхэн урьдчилан сэргийлэх вэ?
-Ерөөсөө л эрүүл амьдралын хэв маягт суралцах хэрэгтэй. Зөв хооллолт, амьдралын зөв хэв маягтай болох хэрэгтэй. Дасгал хөдөлгөөн сайн хийж, таргалалтаас сэргийлэх хэрэгтэй. Даралт ихэсдэг, чихрийн шижин өвчтэй, удамд нь бөөрний архаг өвчтэй хүн байдаг бол жилдээ 1-2 удаа эмчийн үзлэгт орох шаардлагатай. Эцэст нь хэлэхэд, бөөрний өвчнөөр настай хүн л өвддөг гэсэн ойлголт байхгүй. Би залуу байгаа юм чинь гэж тоохгүй явсаар хүндрүүлдэг шүү. Тиймээс ядаж жилдээ ганц удаа эрт илрүүлэгт хамрагдаарай.