ОХУ, Украин улсууд Хар тэнгист гал зогсоож, аюулгүй байдлыг хангах үүрэг хүлээх тохиролцоонд хүрснийг Цагаан ордны зүгээс мягмар гарагт албан ёсоор мэдэгджээ.
Хоёр тал мөн Хар тэнгист арилжааны усан онгоцуудыг цэргийн зориулалтаар ашиглахаас урьдчилан сэргийлэх тал дээр тохиролцсоныг Вашингтоны зүгээс мэдэгдсэн байна.
Өнгөрсөн долоо хоногийн ням гарагаас энэ долоо хоногийн мягмар гараг хүртэл АНУ-ын зуучлалаар Саудын Араб улсад тус тусдаа явагдсан техникийн түвшний яриа хэлэлцээний үр дүнд ийнхүү талууд тэнгисийн бүсэд буюу Хар тэнгист гал зогсоох тохиролцоонд хүрлээ.
Түүнчлэн Орос, Украины хооронд эрчим хүчний байгууламжуудад цохилт үзүүлэхийг хориглох тохиролцоонд хүрснийг АНУ-ын тал мэдэгдлээ.
Эрчим хүчний дэд бүтцийн тал дээр талуудын ашигласан нэр томъёо өөр байсан ч эх сурвалжуудын мэдээлж байгаагаар эрчим хүчний байгууламжуудын жагсаалтад газрын тос боловсруулах үйлдвэр, ус шахах станцыг багтаасан газрын тос, хий дамжуулах хоолой, агуулахын байгууламж, цахилгаан станц, дэд станц, трансформатор, дамжуулагч зэрэг цахилгаан эрчим хүч үйлдвэрлэх, дамжуулах дэд бүтцийн байгууламжууд, мөн цөмийн цахилгаан станц, усан цахилгаан станцын далан зэрэг багтжээ.
Цагаан ордны мэдэгдэлд мөн АНУ олон улсын зах зээлд ахин ХАА-н гаралтай бүтээгдэхүүн болон бордоо экспортлох тал дээр ОХУ-д дэмжлэг үзүүлж, хоригдол солилцоо болон хүчээр Орост очсон Украин хүүхдүүдийг нутаг буцаах тал дээр Киевт туслалцаа үзүүлнэ гэдгээ нэмж мэдэгдсэн байна.
АНУ-ын зүгээс хоёр талын хоорондох яриа хэлэлцээг үргэлжлүүлэн явуулсаар байх болно гэдгээ мэдэгдсэн байна. Гэхдээ Цагаан ордны мэдэгдэлд Хар тэнгисийн бүсэд болон эрчим хүчний дэд бүтцүүдэд гал зогсоох тохиролцоог хэзээнээс хүчин төгөлдөр хэрэгжүүлж эхлэх талаар тодорхой мэдээлээгүй байна.
Саудын Арабын нийслэл Эр Рияд хотноо явагдсан уулзалтуудаас гарсан шийдвэр, үр дүнгийн талаар мөн ОХУ болон Украин улсын ерөнхийлөгчийн албаны зүгээс мягмар гарагт мөн албан ёсны мэдэгдлийг гарган танилцууллаа.
Кремлийн мэдэгдэлд дээр дурьдсан тохиролцоонуудад хүрснийг мэдээлсэн ч хүчин төгөлдөр хэрэгжүүлж эхлэхээс өмнө зарим тодорхой нөхцлүүдийг хангасан байх ёстойг цохон тэмдэглэсэн байна. Тодорхой нөхцөл гэдэгт Оросын эсрэг тавьсан худалдаа болон санхүүгийн шилжүүлгийн (SwiftPay) хоригууд, мөн далайн гаралтай бүтээгдэхүүн гэх зэрэг хүнсний экспортод тавьсан хоригуудыг цуцлах ёстой гэдгийг онцолжээ.
Харин Украины ерөнхийлөгч В.Зеленский мэдэгдэлдээ дээрх тохиролцоонуудыг шууд хэрэгжүүлж эхлэх болно гэсэн байна. В.Зеленский Киев хотноо хийсэн хэвлэлийн бага хурлын үеэрээ Хар тэнгист гал зогсоох тохиролцоог “бүх зүйл зөв замдаа орох эхний алхам” хэмээн тодорхойлж, одоо хэн ч Украин улсыг энхийн гэрээнд саад гацаа болж байгаа гэж буруутгахгүй чадахгүй гэжээ. Мөн тэрээр хэрвээ Москва гал зогсоох тохиролцоог зөрчсөн тохиолдолд Оросын эсрэг нэмж хориг арга хэмжээ авч, Украинд зэвсэг нийлүүлэхийг АНУ-ын ерөнхийлөгч Д.Трампад уриалах болно гэдгээ нэмж хэлсэн байна.
Хэдийгээр ийнхүү Хар тэнгист гал зогсоож, эрчим хүчний дэд бүтцүүдэд цохилт үзүүлэхийг хориглох тохиролцоонд хүрсэн боловч мягмар гарагт Эр Рияд хотноо яриа хэлэлцээ явагдаж байх үеэр Оросын иргэний эрчим хүчний дэд бүтцүүдэд үргэлжлүүлэн цохилт үзүүлсэн талаар Москвагийн зүгээс Украиныг буруутгасан мэдэгдлийг мөн хийжээ. Дээрх цохилтоороо Зеленский өөрийгөө “гал зогсоох тохиролцооны үүргээ дагаж мөрдөх чадваргүй” гэдгээ харууллаа хэмээн ОХУ-ын Батлан хамгаалах яамны зүгээс мэдэгдсэн байна. Эсрэгээрээ Оросын талаас даваа гарагт Украины зүүн хойд хэсгий Суми хотод агаарын цохилт үзүүлсний улмаас 100 гаруй хүн шархадсан бол мягмар гарагийн өглөө мөн 139 дрон болон нэг баллистик пуужин харвасныг Украины талаас мэдэгджээ.