Япон улсад хүн амины хэргээр цаазын ял авч, 50 орчим жил хоригдсон эрэгтэйг дээрх хэрэгт буруугүй болохыг тогтоон цагаатгаж, улмаар урьд өмнө түүхэнд байгаагүй өндөр хэмжээий нөхөн төлбөр олгожээ.

Өдгөө 89 настай Ивао Хакаматаг 1968 онд ажлынхаа газрын даргыг эхнэр, хоёр хүүхдийнх нь хамт хороосон хэрэгт буруутай хэмээн цаазаар авах ял оноож байсан бөгөөд тэр цаг үеэс хойш 47 жилийн турш гэм буруугүй гэдгээ нотлохыг оролдсон байна.

Түүнийг гэм буруугүй гэдгийг өнгөрсөн жил тогтоож, цагаатгасан байна. Улмаар түүнд 217 сая иен буюу 1.45 сая ам.доллартай тэнцэх нөхөн төлбөрийг олгохоор болсон нь тус улсын эрүүгийн хэргийн түүхэнд байгаагүй өндөр хэмжээний нөхөн төлбөр болохыг Ивао Хакаматагийн өмгөөлөгч нар онцолжээ.

Дээрх нөхөн төлбөрийг түүний торны цаана суусан хугацаагаар тооцвол шоронд өнгөрүүлсэн өдөр бүрдээ тэрээр 83 ам.доллартай тэнцэх хэмжээний мөнгийг Япон улсын засгийн газраас авахаар болсон байна.

Хилсээр шийтгэгдэж, торны цаана суусан 47 жилийн хугацаанд түүний эрүүл мэндийн байдал, ялангуяа сэтгэцийн эрүүл мэнд дордсон болохыг өмгөөлөгчид нь мөн мэдээлжээ.

Ноён Ивао Хакаматагийн эгч болох өдгөө 91 настай Хидеко Хакамата олон арван жилийн турш дүүгийнхээ гэм буруугүйг нотлохыг оролдсоны хүчинд 2014 онд дүүгээ шоронгоос суллаж авч байсан бөгөөд сэтгэцийн эрүүл мэнд нь муудсан Ивао Хакамата суллагдсанаасаа хойш өнөөдрийг хүртэл эгчийнхээ асрамжинд амьдарч байгаа ажээ. Түүний хэрэг Япон улсын түүхэнд хамгийн урт удаан хугацаанд үргэлжилсэн хэргийн нэг юм.