Цахилгаан автомашины үйлдвэрлэлээр дэлхийд тэргүүлэгчдийн нэг болох Хятадын BYD компани 2024 оны нийт борлуулалтын орлогын хэмжээгээрээ өрсөлдөгч Tesla компанийг давсан байна.
БНХАУ-ын Шенжень хотноо төвтэй BYD компанийн зүгээс өнгөрсөн онд борлуулалтын орлого нь 29%-иар өсөж, нийт 777 тэрбум юань буюу 107 тэрбум ам.долларт хүрснээ зарласан байна.
Харин өмнө нь зарлан мэдээлснээр Элон Маскын Tesla компанийн 2024 оны нийт борлуулалтын орлогын хэмжээ 97.7 тэрбум ам.долларт хүрсэн юм.
BYD компанийн зүгээс гибрид буюу хосолмол хөдөлгүүртэй автомашины худалдааны хэмжээ өссөн нь нийт борлуулалтын орлого нэмэгдэхэд нөлөөлснийг онцолжээ.
Хятадын BYD компани өнгөрсөн жил 1.76 сая ширхэг цахилгаан автомашин борлуулсан бол Амеркийн Tesla компани 1.79 сая ширхэг цахилгаан автомашин борлуулсан байна.
Харин BYD компанийн гибрид хөдөлгүүртэй автомашины зарагдсан тоо хэмжээг нэмж тооцвол өнгөрсөн жил тус компани дэлхийн хэмжээнд нийт 4.3 сая ширхэг автомашин зарж борлуулснаараа дээд амжилт тогтоожээ.
Tesla компанийн худалдааны үзүүлэлт буурч байгаа явдлыг салбарын шинжээчид Элон Маскыг улс төрд орж, АНУ-ын ерөнхийлөгч Д.Трамптай хамтарч ажиллах болсонтой холбон тайлбарлаж байна.
Эсрэгээрээ Хятадын BYD компани улам л хүчирхэгжсээр байгаа бөгөөд өнгөрсөн ням гарагт тус компани Tesla-гийн Model 3 загвартай өрсөлдөх зорилго бүхий хямд үнэтэй Qin L хэмээх цоо шинэ загварын автомашинаа танилцуулаад байна. Tesla-гийн стандарт Model 3 загвар Хятадад 235,500 юанийн үнэтэй байдаг бол Qin L загварын эхлэх үнэ 119,800 юань гэнэ.
Өнгөрсөн долоо хоногт мөн BYD компанийг үүсгэн байгуулагч Ван Чуаньфу цахилгаан автомашиныг ердөө 5-хан минутын дотор цэнэглэх боломжтой, зай хураагуур цэнэглэх шинэ технологийг албан ёсоор зарлан танилцуулсан байна. Харин Tesla-гийн хурдан цэнэглэх систем ойролцоогоор 15 минутад бүрэн цэнэглэдэг ажээ.
Өнгөрсөн жилийн борлуулалтын орлого нь нэмэгдэж, Tesla-г давсан Хятадын BYD компанийн хувьцааны ханш мөн 2024 онд 50 гаруй хувиар огцом өсөн нэмэгдсэн байна. Эдгээр амжилтын хажуугаар BYD тэргүүтэй Хятадын цахилгаан автомашин үйлдвэрлэгч компаниудын эсрэг АНУ, ЕХ гэх зэрэг томоохон улс орнууд, бүс нутгууд өндөр тарифын нэмэгдэл тогтоогоод байгаа билээ.