УИХ-ын чуулганы нэгдсэн хуралдаанаар Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээрийг соёрхон батлах тухай хуулийн төсөл болон бусад төслүүдийг хэлэлцэж эхэллээ.

УИХ-ын гишүүн Л.Мөнхбаясгалан:

2010 оны 6 дугаар сарын 24-ний өдөр Монгол улсын төрөөс төмөр замын талаар баримтлах бодлого батлагдсан тэр өдөр эхэлсэн төмөр замын дажин өнөөдөр дуусаж байна. Ийм өдөр ирдэг л юм байна. 2014 оны 8 дугаар сард Монгол улсын Ерөнхийлөгч Ц.Элбэгдорж удирдаж Ч.Сайханбилэгийн засгийн газар нууц гэрээ байгуулсан.Тэр гэрээ өнөөдөр монгол хэл дээр байхгүй. 10 жилийн дараа Монгол Улсын Ерөнхий сайд Л.Оюун-Эрдэнэ таван намын хамтарсан засгийн газар энэ гэрээг очиж хятад хэл дээрхийг нь олж ирсэн. Энэ гэрээг олон нийтэд ил болгомоор байна. Шударга ёсыг нэхэмжилж байна. Мөн Ц.Элбэгдорж, Ч.Сайханбилэг нарыг баривчилж хариуцлага тооцохгүй юм уу ?

ХЗДХ-ийн сайд О.Алтангэрэл:

Бүхэл бүтэн стратегийн ордтой холбоотой гэрээний хувь нь төрд байдаггүй. Айлын талтай асуудал ярихаар төрийн өндөр албан тушаалтан гарын үсэг зурчихсан бидэнд байхгүй гэрээ бас гарч ирдэг.Ийм байдал байж болохгүй ээ. Үүнийг одоо цэгцлэхгүй бол цаашид энэ байдал тасрахгүй ээ. Тийм учраас Монгол улсын засгийн газраас энэ асуудалд онцгой анхаарал тавьж ажлын хэсэг байгуулаад ажиллаж байна.