2025-2026 онд “Цалинтай ээж” хөтөлбөрийн сар бүр өгдөг 50 мянган төгрөг нэмэгдэнэ гэх хүлээлт олон нийтэд байсан ч ГБХНХ-ын сайд Л.Энх-Амгалан ийм боломж байхгүй хэмээн мэдэгдлээ.

Тэрээр “Монгол улсын жилд 2.4 их наяд төгрөгийг халамжид зарцуудаг. Үүний 1.7 их наяд нь дангаараа хүүхдийн мөнгө юм. Яг халамжид зарцуулж буй төсөв бол 600-700 орчим тэрбум төгрөг л байна. Хүүхдийн мөнгө, цалин ээжийн төсвийг би халамж гэж харахгүй байгаа. Нэгэнт төсвийн орон зай бага байгаа учир гурван жилийн турш сар бүр 50 мянган төгрөгийг авах уу эсвэл 0-6 сар хүртэл буюу нярай үед нь 100-150 мянган төгрөгийг авах уу гэх сонголт байж болно.Ийм л тооцоллоор ярихгүй бол сэтгэлийн хөөрлөөр сарын 500 мянган төгрөг болгоно гэдэг бол боломжгүй.

Хэрэв цаашид энэ хөтөлбөр “цалинтай ээж” нэрээрээ үргэлжилбэл хөдөлмөрийн хөлсний доод хэмжээгээр тогтоох ёстой гэсэн санал санаачилга зарим гишүүдээс гарсан байна лээ. Харин нэрийг нь өөрчлөөд “нярайн дэмжлэг” гэж болох боломжтой” гэв.