Хөвсгөл аймгийн Ханх сумаас Хатгал тосгон руу 3-р сарын 27-нд Хөвсгөл нууран дээгүүр явж байсан суудлын машин Алаг-Эрдэнэ сумын 6 дугаар багийн Хатгал тосгоны Хирвэстийн-Аманд живжээ. Уг газар нь аймгийн төвөөс хойд зүгт 140 км, Хатгал тосгоноос хойд зүгт 40 км зайтай.
Уг ослын тухай дуудлага 3-р сарын 27-ны 06:40 цагт онцгой байдлын албанд иржээ. Тус аймгийн Онцгой байдлын газрын 69 дүгээр ангийн албан хаагчдыг очиход “HONDA CR-V” загварын суудлын машин Хөвсгөл нуурын баруун эргээс 20 метрийн зайтай, 1 метр гүн усанд живжээ. Уг хэсэгт мөсний зузаан 4 см байгаа аж. Мөс цөмөрөхөд машин нуурын эргээс 30 метрийн зайд хажуу талаараа унасан аж.
Аврагчид 5 цаг ажиллан, уг машиныг татан гаргажээ. Тухайн машинд 3 зорчигч явсан агаап бүгд машинаас эсэн мэнд гарч чадсан байна.
Хөвсгөл аймгийн засаг дарга захирамж гарган, мөсөн замын тээвэрлэлтийг хориглосон. Гэвч иргэд зам дөтлөх зорилгоор Хөвсгөл нууран дээгүүр зорчсоор байна. Иргэд, малчид, тээвэрчид гол, нуурын мөсөн дээгүүр явж, өөрийн болон бусдын амь нас, эд хөрөнгөнд хохирол учруулахгүй байхыг Хөвсгөл аймгийн Онцгой байдлын газраас онцгойлон анхааруулж байна.