Өнгөрсөн шөнө бороо орсны улмаас цаг агаарын температур харьцангуй сэрүүсэж үзэгдэх орчин сайжирч байгаа талаар зүүн өмнөд бүс нутагт ажиллаж буй гал сөнөөгчид хэлжээ. 28 хүний амийг авч одсон аймшигт түймэр хүчтэй салхи, хуурайшилтаас үүдэн гарсан бөгөөд өнгөрсөн баасан гарагаас хойш хээрийн түймэрт 37 хүн гэмтэж бэртэж, 38,000 орчим хүн дүрвэсэн гэж Засгийн газрын гамшгаас хамгаалах агентлаг мэдээллээ.

Сөүл хотын нийт талбайн 80 орчим хувьтай тэнцэх 48,000 га ой мод шатсан гэж тус агентлаг мөн мэдээлэв. Энэ нь 2000 онд зүүн эргийн ойн түймэрт өртсөн 23,794 га талбайгаас бараг 25,000 га талбайгаар илүү байгаа нь Солонгос улсын түүхэн дэх хамгийн аймшигтай түймэр хэмээн нэрлэгдэж байна.

Солонгосын Ойн албаны (KFS) дарга Лим Санг Сеоп сэтгүүлчдэд хэлэхдээ “Бид өдрийн эцэс гэхэд гол галыг унтраахын тулд бүх нөөц бололцоогоо дайчлахаар төлөвлөж байна” гэжээ. Шөнө орсон борооны улмаас үзэгдэх орчин сайжирч, сэрүүн температур нь түймрийг дарахад таатай нөхцөл бүрдүүлсэн гэж мэдэгджээ. Хойд Кёнсан мужийн Үйсеон болон бусад бүс нутагт гарсан хээрийн түймрийг бүрэн дарахын тулд 5580 албан хаагч, 86 гал унтраах нисдэг тэрэг, 569 гал унтраах машин ажиллаж байна. Найман өдрийн турш бусад бүс нутгийг хамарсан түймрийг дарах түвшин 95 хувьд хүрсэн гэж албаныхан мэдэгдэв. Цаашид тархах эрсдэл өндөр байгаа Ёондок, Чонгсон, Ёньян мужуудад гол хүчээ төвлөрүүлнэ гэжээ.

Эх сурвалж : Ёнхап агентлаг