УИХ-ын гишүүн Ц.Мөнхтуяа 4 өнчин хүүхдэд хандиваар авч өгсөн орон сууцандаа өөр хүмүүс амьдруулсан, хүүхдүүдийн сурах эрхийг зөрчиж байна гэх мэдээллийг иргэн Б.Идэржавхлан цахим орчинд цацаад байгаа. Тэгвэл УИХ-ын гишүүн Ц.Мөнхтуяагаас энэ асуудлаар тайлбар авлаа.

– Таныг хүүхдүүдийг хохироогоод байгаа тухай иргэн Б.Идэржавхлан мэдэгдэл хийсэн байна лээ. Та үнэхээр тэр хүүхдүүдийг хохироосон юм уу?

– Би энэ тухай өмнө нь ярьсан шүү дээ. Тэр хүүхдүүд байрандаа байгаа.

– Та байранд нь өөр багш нарыг суулгасан юм биш үү?

– Үгүй шүү дээ. Тийм юм байхгүй. Очоод үзчихгүй юү дээ. Амар шүү дээ. Очоод үзчих. Тэр ийм учиртай. Эгч нь хаяж яваад 3 дүү нь эзгүй болчихоор нь 2 багшийг хажууд нь байлгасан юм. Хүүхдүүдийг бүр харах эзэнгүй ер нь хэцүү байх нь сумын сургууль руу явуулсан. Гуйж байгаад явуулсан юм дотуур байртай сургууль руу.

– Эгч нь өөрөө байрандаа байсан юм уу?

– Дүү нараа явсны дараа эгч нь байрандаа байсан. Жирэмсэн байсан юм.

-Та ямар багш нарыг тэднийд байлгасан юм бэ?

– Үгүй багш биш, зүгээр 2 оюутан хүүхэд.

– Байрны өмчлөл хэний нэр дээр байдаг вэ?

– Охины нэр дээр байдаг.

– Та хамтран амьдрагчаа зөвлөхөөрөө ажиллуулж байгаа юм уу? Мөнхбаатар багшийг?

– Хамтран амьдрагч гэж байхгүй надад. Юу яриад байгаа юм бэ? Нотлох баримтыг нь гаргаад ир дээ.

– Танай салбарынхан бүгд ярьж байна шүү дээ.

– Битгий тэгж хүн гүтгээд бай. Тэгээд ч хүний дотоод амьдрал чамд хамаатай юу? Би чамайг шүүхэд өгнө. Ер нь та нар нүүрсний хулгай зэрэг том том хулгай хийсэн хүмүүстэйгээ хөөцөлд л дөө. Би ямар ч гэмт хэрэг хийгээгүй.

– Гэхдээ та тэр хүүхдүүдийг цахим орчинд аягүй эвгүй хүүхэд гэж хэлсэн байна лээ?

– Эвгүй гэдгийг багш нар бүгдээрээ хэлсэн

– Эвгүй гэдэг нь юу гэсэн үг вэ?

– Би яаж мэдэх вэ дээ. Ангийнх нь багш хүртэл хэлж над руу бичсэн байхгүй юу.

– Яг ямар асуудал гаргаад байдаг юм бол?

– Яах юм бэ? тэр хүүхдийн асуудлыг яриад хэрэггүй биз. Би хүүхдийн нэр хүндийн асуудлыг энд ярьчих зүгээр үү?

УИХ-ын гишүүн Ц.Мөнхтуяа ахин асуултад хариулахаас цааргалсаар ярилцлага өндөрлөлөө.