УИХ-ын гишүүн М.Нарантуяа-Нараг цахим сүлжээнд эмэгтэйчүүдийг доромжилсон асуудал олны анхаарлын төвд байна. Тэгвэл шинэхэн гишүүн өөрийгөө буруу үйлдэл хийсэн гэж үзэхгүй байгаа юм. Ингээд түүнээс авсан тайлбараа хүргэе.

-Сошиал орчинд таныг эмэгтэйчүүдийг доромжилсон тухай шуугьж байна. Та үүнд ямар тайлбар өгөх вэ?

-Хүн намайг доромжилбол би найрсаг хариу барьдаггүй хүн шүү дээ. Би байдгаараа л байж байна. Зүв зүгээр байж байгаа хүнийг очоод л хөөе чи ийм байна тийм байна гээд байдаг төрлийн хүн биш. Монголчууд ер нь ийм зантай шүү дээ. Могойн толгойг модоор тогшоод тогшсоныг нь гайхав гэгчээр. Би мөрөөрөө ажлаа хийгээд явж байгаа хүн. Уг нь хичээгээд ажиллъя гээд зорьж байгаа юм. Гэхдээ өөрсдөө бас тийм боломжоор хангаж өгөхгүй байна шүү дээ. Ер нь УИХ-ын гишүүн болчихсон байхаараа иргэн 1 бүрийн шаардлагыг хүлээж аваад л тулган шаардсан болгоных нь дагуу амьдраад амьсгалаад, үг хэлээд  байна гэж байхгүй. Намайг эхэлж оролдсон хүнд хариуг нь барьчихсан чинь бүгдээрээ л намайг тэглээ гээд эмзэглэцгээгээд байх юм. Гайхаад л байж байна.

-Улс төрд орсон хэн бүхнийг л ард түмэн, хэвлэл мэдээлэл их бага хэмжээгээр “нүдэж” байдаг нь бараг бичигдээгүй хууль болчихлоо. Нэгэнт ийм салбарт орсон хүн тэгээд хандсан хүн бүрт хариу бичээд байх юм уу?

-Харин тийм ээ. Нүдүүлэх үедээ нүдүүлээд л. Босох үедээ босоод л явж байхаас өөр яах билээ?

-Түрүүн УИХ-ын Ёс зүй, дэгийн байнгын хорооны дарга тантай хариуцлага ярих байх гэдэг зүйл ярина лээ. Тэр хариуцлагад нь сануулга өгөх, эсвэл УИХ-ын гишүүнээр уучлал гуйлгах гэдэг заалт байдаг гэсэн?

-Би яасан гэж уучлал гуйх юм бэ? Намайг зүгээр байж байхад миний үг хэлэх эрх чөлөөнд халдсан хүнд хариу өгсөндөө би яасан гэж би нийтийн өмнө буруудах ёстой юм бэ? Таныг жишээлбэл сурвалжлагаа хийгээд мөрөөрөө ажиллаж байтал 1 хүн хүрч ирээд л үснээс чинь зулгаагаад л чи наадах аа боль, үүнийг сурвалжил гээд л тулгавал танд сайхан байх уу? Та үг дуугүй тэр хүний үгэнд орох уу? Хэдий таны эрхийн асуудал, таны ажил мөн ч гэлээ. Харилцаанаас харилцаа үүснэ шүү дээ. Зарчмын асуудал шүү дээ. Энэ тохиолдолд би хэнээс яасан гэж уучлал гуйх ёстой юм бэ? Би хүний эрхийн асуудал ярьж байхад миний амаар юу ярихыг заадаг тэр ер нь хэн юм бэ? Хэнд ч тийм эрх байхгүй шүү дээ. Ерөнхийлөгч, УИХ-ын дарга байлаа ч хэн нэгний амаар юу ярихыг заах эрхгүй. Иргэн болохоор нь л би юу ч гэж хэлсэн дуугүй хүлцээд явж байх ёстой гэж үү? Би өөрийгөө зарчмын хувьд зөв л юм хийсэн гэж бодож байгаа. Надад уучлал гуйх шаардлага байхгүй. Ер нь яасан гэж би уучлал гуйх юм?

-Цахим орчинд идэвхтэй байдаг тэр олон мянган хүмүүс дунд олон төрлийн хүн байдаг байх. Эрүүл бус хүн байхыг ч үгүйсгэх аргагүй. Та УИХ-ын гишүүн хүн олон нийтийн өмнө олон удаа гарч таарах байх. Тэр болгондоо иргэдээс ирж байгаа энэ олон сэтгэгдэлд хариулт өгөх шаардлага үүснэ гэж үү?

-Сошиал орчинд байгаа олон төрлийн хүмүүсийг ойлгож байна. Мэдээж яриа сэтгэгдэл бүрт хариулт өгнө гэвэл бүтэхгүй. Тэр болгонд хариу бичвэл ажлаа ч хийж амжихгүй. Өдөр бүр л хуйларч байдаг асуудал шүү дээ. Нийтэд таалагдах хүсэл хамгийн тэнэг хүсэл байдаг гэдэг. Алинд нь таалагдах гэхэв? Өөрийнхөө голчийг бариад л өөрийнхөө л гэлдэрнэ дээ. Хэрвээ УИХ-ын Ёс зүй дэгийн байнгын хорооны дарга надаар уучлал гуйлгана гэвэл тэр бүтэхгүй санаа. Яагаад гэвэл би хэний ч өмнө буруутай зүйл хийгээгүй. Би зөвхөн нийгэмд тулгамдаад байгаа асуудлын бодит үнэнийг л хэлсэн. Ингэлээ гээд буруудна гэж бодохгүй байна. Харин Монголын ард түмэн тэгж их эгдүүцээд байгаа юм бол өмнө нь  өөрсдийнх нь боломжоос нь хулгайлж байсан гишүүдээрээ уучлал гуйлгасан нь хэд байгаа юм?  Өмнө нь өөрсдөөс нь хулгайлж хүчирхийлж байсан гишүүдийгээ эргүүлэн татах нь битгий хэл ёс зүйн хороогоор  оруулж уучлал гуйлгасан нь хэд байгаа юм бэ? Юутай тэмцэх, юутай тэмцэхгүйгээ мэдэхгүй ард түмэн хэцүү байдаг юм байна. Үнэн үг хатуу сонсогдоод байж магадгүй. Магадгүй зарим 1 улс төрийн сонирхолтой нөхдөд лайв хийх шалтаг болсон байх. Попорч оноо авч байх шиг байна. Тэрийг бол би ойлгож байна. Гэхдээ эцсийн эцэст юутай тэмцээд байгаа юм бэ гэдгээ л ойлгох хэрэгтэй. Үнэнийг нь хэлэхээр эмзэглэсэн хүмүүс их байж болох юм. Хүүхдээ асрамжийн газар аваачаад хаячихаагүй юм гэхэд хүүхдээ хүчирхийлүүлж байгааг хараад дуугүй суудаг, хүүхдээ үл хайхардаг ээжүүд  байдаг шүү дээ. Тийм байж бүгдээрээ төгс юм шиг, төгс төгөлдөр нийгэмд бүгд төгс юм шиг аашлаад байх хэрэггүй байхгүй юу. Хэрвээ миний хэлсэн дотор ямар 1 хэмжээгээр үнэн байгаа л бол үүнийг хүлээн зөвшөөрөх л ёстой байхгүй юу. Бүх юмыг өөр дээрээ хүлээж аваад эмзэглээд байгаа бол тэр үнэн үг байна шүү дээ. Ямар би Хажидмаа чи  гэж бичээгүй бол хүний өмнөөс эмзэглэнэ гэдэг илүү юм. Харин над руу юм бичээд хариу авсан хүн бол “хэлэх үг чинь ямар байна, сонсох үг чинь тийм байна” гэдэг зарчимын дагуу л хариулт авсан гэж бодох хэрэгтэй. Тэр хүн хэрвээ гомдолтой байна гэвэл зөрүүлээд бас надад гомдол байгаа учраас бид 2-ын асуудлыг бол шийдэж болно. Харин нийтийн өмнө, бусдын өмнө, Монголын ээжүүдийн өмнө би буруу юм хийгээгүй, хэлээгүй учраас хэзээ ч уучлал гуйхгүй. Хэрэв үнэхээр буруу юм хийчихсэн, Монголын нийт ээжүүдийг би өөрийн амаар өөрийн бичгээр Монголын ээжүүд бол гээд биччихсэн бол би өвдөг сөхрөөд ч хамаагүй уучлал гуйж чадна. Надад тийм морал байгаа. Харин над руу чулуу шидсэн хүн рүү буцааж чулуу шидсэний төлөө уучлал гуйна гэж байхгүй.

-Тайлбар өгсөнд баярлалаа.