Улаанбаатар хотын агаар, ус, хөрс, дуу чимээ гээд бүгд бохир. Цэвэрлэх байгууламж, модон жорлонгуудын үнэр хот даяар тархаж, хамраа дараад ч нэмэргүй, цонхоо онгойлгох аргагүй болоод байна.
Тиймээс өнгөрсөн долоо хоногт Засгийн газар нийслэлийн үнэрийн бохирдлыг тодорхойлох техниктэй болохоор шийдвэрлэжээ. Олон улсад өргөн ашигладаг үнэрт нүүрсустөрөгч тодорхойлох суурин багаж, дагалдах тоног төхөөрөмж авч, ЦУОШГ-ын Байгаль орчин, хэмжилзүйн төв лабораторид өгөхөөр болжээ.

Тус лаборатори Улаанбаатар хотын агаарын чанарыг 13 автомат суурин станц дээр 6 үзүүлэлтээр, гадаргын болон хаягдал бохир усны хяналт шинжилгээг сар бүр 8-17 цэгт 10-23 үзүүлэлтээр, хөрсөн дэх хүнд металлыг 7 үзүүлэлтээр, агрохимийн шинж чанарыг 6 үзүүлэлтээр тодорхойлж, агаар, ус, хөрсний чанарын хяналт шинжилгээ хийдэг.

Гэвч агаар, ус, хөрс, дуу чимээ, үнэрийн бохирдлыг нарийвчлан тодорхойлох техникгүй байгаа аж.

Түүнчлэн БОУАӨЯ-наас БНСУ-ын Эксим банкны хөнгөлөлттэй зээлээр хэрэгжиж буй “Байгаль орчны шинжилгээний төв лабораторийн чадавхыг сайжруулах МОН-21” төслийн хүрээнд лабораторийн барилга шинээр баригдаж, агаар, ус, хөрсөн дэх бохирдлыг 100-аас доошгүй үзүүлэлтээр тодорхойлох боломж бүрдүүлэхээр ажиллаж байгаа юм байна.