<h5 class="wp-block-heading has-text-align-center">Энэ спортыг хагарал, тэмцэлгүйгээр эв нэгдэлтэйгээр хөгжүүлье</h5> <p><em>Гуравхан хоногийн өмнө 3х3 сагсан бөмбөгийн Азийн аварга шалгаруулах тэмцээн болж өнгөрлөө. 4 удаагийн аварга Австрали улс дахин түрүүлснээр Ази тивдээ ноёлж байгаагаа бататгав. Харин Монгол Улсын эрэгтэй, эмэгтэй шигшээ багийнхан хасагдах шатнаас мултарч, энэ жилийн Азийн аварга шалгаруулах тэмцээнээ өндөрлүүллээ.</em></p> <p><em>2023 онд эрэгтэйчүүдийн баг Австралийн шигшээ багийг хожин, Азийн аварга болж, монголчуудын магнайг тэнийлгэж байв. Тэгвэл энэ баярт хожилд С.Тулга дасгалжуулагчийг дурдахгүй байхын аргагүй. Тиймээс 3х3 сагсан бөмбөгийн талаар Монгол Улсын гавьяат дасгалжуулагч С.Тулгатай ярилцлаа.</em></p> <p>&#8211;<strong>3х3 сагсан бөмбөгийн Азийн аварга шалгаруулах тэмцээн болж өнгөрлөө. Харамсалтай нь Монгол Улсын эрэгтэй, эмэгтэй шигшээ баг хасагдах шатнаас тэмцээнээ өндөрлүүллээ. Үүний дараа та өөрийн цахим хуудсандаа сэтгэгдлээ илэрхийлсэн байсан.</strong></p> <p>-Сагсан бөмбөгийн 3х3 төрөл монголчуудын бахархал болсон. Энэ удаа Азийн аварга шалгаруулах тэмцээнд эрэгтэй, эмэгтэй баг маань амжилтгүй оролцлоо. Өмнө нь маш олон удаа сануулж байсан. Монголын 3х3 сагсан бөмбөгийн баг ухраад байна, хожигдох гээд байна гээд сануулдаг байсан. Энэ нь бодитоор биеллээ.</p> <p>&#8211;<strong>Та сэтгэгдлээ хуваалцсан байсан шүү дээ. Азидаа ч гарахаа байлаа гээд. Хожигдлын гол шалтгаан юу байв. Мэдээж та энэ спорттой салшгүй холбоотой. Өөрөө удирдаж байсан хүний хувьд яагаад ийм зүйл болсон гэж бодож байна вэ?</strong></p> <p>-Монголд үлгэр жишээ хамт олон 3х3 сагсан бөмбөгийн гэр бүл байсан. Монгол түмний баялаг биш, бахархал болчихсон байсан. Бидний ирээдүй болсон залуучууд, өсвөр үеийнхэн, хүүхдүүд 3 сая 700 мянгуулаа анхаарч үздэг спорт болсон нь сайшаалтай. Эв нэгдэлтэй байсан хамт олон маань дотроо хагарч, компьютрээр бол вирустэй боллоо. Тиймээс энэ вирусыг эрт дээр нь устгаж, эмчлэх гэж зөв гарц олох гэж энд суугаад, ярилцлага өгч байна.</p> <p>&#8211;<strong>Хожигдсон гол шалтгаан юу байсан бэ?</strong></p> <p>-Хоёр жил гаран сагсан бөмбөг ярилаа. Цэвэр буруу тактик, менежментээр тоглоод байна. Үнэн гэдэг үр дүн. Үр дүн яаж гарав, тийм ээ. Өчигдөр 3х3 сагсан бөмбөгт том хар өдөр боллоо шүү дээ. Олон олон ийм хар өдөр байлгахгүйн тулд, байшингаар бол шатаачихгүйн тулд урьдчилан сэргийлэх арга хэмжээ болгоод, энэ тухай ярьж байгаа юм.</p> <p>Бид өмнө нь хоёрдугаар байрт хоёр удаа ороод, мөнгөн медаль авчихсан байсан. Монголчууд Ази тивийнхээ багт хожигдож үзээгүй байлаа. Австралийн багт хожигддог. Өчигдөр Австрали улс эрэгтэй, эмэгтэй багаараа түрүүллээ. Бид Ази тивд 2 алт, 2 мөнгөн медаль авчихсан байсан. Хамгийн сүүлд 2023 онд аварга болсон шүү дээ. Ингээд сарын дараа Бельги улсад болох Дэлхийн аварга шалгаруулах тэмцээнд ази хүн сагсан бөмбөгөөр 5х5 төрөлд, 3х3 төрөлд медаль авч чаддаггүй байхад, Дэлхийн аваргаас медаль авъя гээд залуучуудтайгаа зорилго тавиад очъё гэж байсан.</p> <figure class="wp-block-image size-large"><img loading="lazy" decoding="async" width="1024" height="682" src="https://admin.time.mn/wp-content/uploads/2025/04/download-1-1024x682.jpg" alt="" class="wp-image-88080" srcset="https://admin.time.mn/wp-content/uploads/2025/04/download-1-1024x682.jpg 1024w, https://admin.time.mn/wp-content/uploads/2025/04/download-1-300x200.jpg 300w, https://admin.time.mn/wp-content/uploads/2025/04/download-1-768x512.jpg 768w, https://admin.time.mn/wp-content/uploads/2025/04/download-1-1536x1024.jpg 1536w, https://admin.time.mn/wp-content/uploads/2025/04/download-1.jpg 2000w" sizes="auto, (max-width: 1024px) 100vw, 1024px" /></figure> <p>Азийн аварга шалгаруулах тэмцээнд түрүүлээд, Монгол Улсын Ерөнхийлөгч Ихтэнгэрийн аманд хүлээж авсны дараа мэргэжлийн багаасаа хасагдсанаа мэдсэн. <em>Яах вэ, шигшээ багтаа яваарай гэхээр нь Дэлхийн аварга шалгаруулах тэмцээнээр Серби улсад очоод байж байсан чинь шигшээ багаас хүртэл болиулсан. </em>Уг нь болгоё, бүтээе гээд болгохын төлөө явдаг шүү дээ. Гэтэл ганц болж байсан, Дэлхийд шок болоод байсан багийн спортын түүхэн амжилтаа алдлаа. Асуудал гадна биш, дотроо л байдаг юм байна. Маш олон хүн бий. Мэдээж удирдлагууд бол амжилт гаргахын төлөө явж байгаа шүү дээ. Удирдлагуудад буруу өгөх гээд яах вэ. Дунд нь яс, хов хаяж байгаа цүнх баригч хүмүүс санасандаа 2 жил хүрлээ. Гэхдээ энэ ажлыг зогсоогоод, ирээдүйтэйгээр Монголын 3х3 сагсан бөмбөгийн гэр бүлийн төлөө ажиллах бодолтой, хүсэлтэй байгаагаа танай Time.mn саитаар дамжуулан хүргэж байна.</p> <p>&#8211;<strong>Танд гадаадаас дасгалжуулагчаар ажиллах хүсэлт ирсэн шүү дээ. Гэхдээ та 3х3 сагсан бөмбөгийн дасгалжуулагчаараа ажиллах хүсэлтэй байна уу?</strong></p> <p>-Надад гадаадаас олон санал ирсэн. Гэхдээ би монгол хүн. Мөнгөөр үнэлж болдоггүй зүйлс гэж байдаг. Би өөрөө 3х3 сагсан бөмбөгийн холбоог байгуулсан. Байхгүй зүйлийг бий болгосон. Өмнө нь ч хэлж байсан. Машинаа хүртэл зараад, байраа барьцаанд тавиад, тэмцээнд явж байсан. Худлаа гэвэл манай тамирчид бүгд гэрчилнэ шүү дээ. Мөнгө олдохгүй, мөрийтэй тоглож хүртэл зардлаа олдог байсан. Энэ бүгд маань эцэстээ ингэж битгий дуусаасай гэж бодож байна. Миний хувьд онцлогтой эсвэл сонирхолтой хүмүүсийн тоонд орох байх. Их сайн эсвэл их муу хүн болох байх гэж боддог. Мэдээж монголчуудынхаа төлөө, бахархал болсон 3х3 сагсан бөмбөгийнхөө төлөө ажиллахад 100% бэлэн байгаа.</p> <p>&#8211;<strong>Таны оронд Стив Сэр дасгалжуулагч ажиллаж байгаа шүү дээ. Сая Азийн аваргаас хасагдсаны дараа сагсан бөмбөг үзэгчид дасгалжуулагчийн тактикийг шүүмжилсэн. Та Стив дасгалжуулагчийн арга барил, түүний талаар юу хэлэх вэ?</strong></p> <p>Монголын 3х3 сагсан бөмбөгийн систем, тактик Дэлхийд гайхагдсан шүү дээ. Хамгийн сүүлд нь Австралийн шигшээ багийг хожоод аварга болсон шүү дээ, 2023 онд. Гэтэл өчигдөр харахад, Австралийг хэзээ ч хожихооргүй юм шиг харагдаж байгаа биз дээ. Тэр багийг хожоод, аварга болсных нь дараа дасгалжуулагчаа солино гэдэг Сагсан бөмбөгийн холбооны ерөнхийлөгч Г.Батцэнгэл, Л.Мягмаржав, MCS-ийн гэр бүлийхэн бүгдийг нь мэдэж л байгаа. Үүнд маш гомдолтой, харамсалтай байгаа. Үзэгч, сагсан бөмбөг сонирхогчид хүртэл зурагтаар үзээд ойлгодог болчихсон байна.</p> <figure class="wp-block-gallery has-nested-images columns-default is-cropped wp-block-gallery-1 is-layout-flex wp-block-gallery-is-layout-flex"> <figure class="wp-block-image size-large"><img loading="lazy" decoding="async" width="1024" height="768" data-id="88075" src="https://admin.time.mn/wp-content/uploads/2025/04/477776531_1844114642995905_1558956912099502944_n-1024x768.jpg" alt="" class="wp-image-88075" srcset="https://admin.time.mn/wp-content/uploads/2025/04/477776531_1844114642995905_1558956912099502944_n-1024x768.jpg 1024w, https://admin.time.mn/wp-content/uploads/2025/04/477776531_1844114642995905_1558956912099502944_n-300x225.jpg 300w, https://admin.time.mn/wp-content/uploads/2025/04/477776531_1844114642995905_1558956912099502944_n-768x576.jpg 768w, https://admin.time.mn/wp-content/uploads/2025/04/477776531_1844114642995905_1558956912099502944_n-1536x1152.jpg 1536w, https://admin.time.mn/wp-content/uploads/2025/04/477776531_1844114642995905_1558956912099502944_n.jpg 2048w" sizes="auto, (max-width: 1024px) 100vw, 1024px" /></figure> <figure class="wp-block-image size-large"><img loading="lazy" decoding="async" width="1024" height="768" data-id="88076" src="https://admin.time.mn/wp-content/uploads/2025/04/470063834_18264584290270441_8571706846106121457_n-1024x768.jpg" alt="" class="wp-image-88076" srcset="https://admin.time.mn/wp-content/uploads/2025/04/470063834_18264584290270441_8571706846106121457_n-1024x768.jpg 1024w, https://admin.time.mn/wp-content/uploads/2025/04/470063834_18264584290270441_8571706846106121457_n-300x225.jpg 300w, https://admin.time.mn/wp-content/uploads/2025/04/470063834_18264584290270441_8571706846106121457_n-768x576.jpg 768w, https://admin.time.mn/wp-content/uploads/2025/04/470063834_18264584290270441_8571706846106121457_n.jpg 1440w" sizes="auto, (max-width: 1024px) 100vw, 1024px" /></figure> </figure> <p><strong>Стивийн хувьд манай багт байх үедээ хожигддог байсан хүн шүү дээ. </strong>Зүйрлэвэл зодоонд (UFC) зодуулдаг хүнээр зодоон заалгана гэж байж болох уу? Үндэсний бөхөөр жишээлбэл унадаг бөхөөр бөх заалгана гэж байх уу? Энэ бол цэвэр атаа хорсол, өс хонзон. Монголын 3х3 сагсан бөмбөгийг харамсалтайгаар нураах гэж буй бодлого шүү дээ. Тэрнээс биш, болж байсан зүйлийг болгохгүй байхын төлөө тэмцдэг систем байж болохгүй биз дээ. Тактик, менежментийн хувьд би хэлээд байгаа юм биш. Монголын сагсан бөмбөгт хайртай мянга мянган хүмүүс, сагсан бөмбөгийн бус хүмүүс ч ойлгоод, ялгаад дүгнэчхэж байна шүү дээ. Тэрнээс захиалгаар ингээд бичээд өг гээд байгаа юм огт байхгүй шүү дээ.</p> <p>&#8211;<strong>Тамирчдын талаар та юу хэлэх вэ? Үзэгчид “Тамирчдаа солих болсон байна. Ур чадвар нь буурсан. Солих хэрэгтэй” гэх зэргээр шүүмжилсэн. Маш олон тэмцээнд удирдан оролцуулсан дасгалжуулагчийн талаас тамирчдын ур чадварын талаар юу хэлэх вэ?</strong></p> <p>-Манай тамирчид охид, хөвгүүд гэлтгүй гайхалтай байгаа шүү дээ. Бие хаагаа бүгдийг нь бэлдсэн. Багийн спортод дасгалжуулагч нь бараг 51 хувь шүү дээ. Дайн байлдаанд ороход жанжин, генарал чухал гэдэг шиг. Дасгалжуулагч маш чухал. Г.Цэнгүүнбаяр хоёр хоногийн өмнө бэртээд, шигшээ баг яана аа гэж байхад н.Гансүхийг нэмээд явсан. Тэгсэн ч Австралийн багт хожигдоод, мөнгөн медаль авсан шүү дээ. Дараа нь 2023 онд аварга болоход бэлтгэл хийлгэхгүй, гуравхан хоногийн бэлтгэлтэй явахад, Монголын сошиалын сая сая аналистууд “Энэ баг бүтэхгүй баг байна” гэж л байсан. &nbsp;&nbsp;&nbsp;</p> <figure class="wp-block-gallery has-nested-images columns-default is-cropped wp-block-gallery-2 is-layout-flex wp-block-gallery-is-layout-flex"> <figure class="wp-block-image size-large"><img loading="lazy" decoding="async" width="1024" height="768" data-id="88077" src="https://admin.time.mn/wp-content/uploads/2025/04/71219792_560210494719666_2433354175845761024_n-1024x768.jpg" alt="" class="wp-image-88077" srcset="https://admin.time.mn/wp-content/uploads/2025/04/71219792_560210494719666_2433354175845761024_n-1024x768.jpg 1024w, https://admin.time.mn/wp-content/uploads/2025/04/71219792_560210494719666_2433354175845761024_n-300x225.jpg 300w, https://admin.time.mn/wp-content/uploads/2025/04/71219792_560210494719666_2433354175845761024_n-768x576.jpg 768w, https://admin.time.mn/wp-content/uploads/2025/04/71219792_560210494719666_2433354175845761024_n-1536x1152.jpg 1536w, https://admin.time.mn/wp-content/uploads/2025/04/71219792_560210494719666_2433354175845761024_n.jpg 2048w" sizes="auto, (max-width: 1024px) 100vw, 1024px" /></figure> <figure class="wp-block-image size-large"><img loading="lazy" decoding="async" width="1024" height="559" data-id="88078" src="https://admin.time.mn/wp-content/uploads/2025/04/h8obzv_Screenshot_20230402-202533_YouTube_x974-1024x559.jpg" alt="" class="wp-image-88078" srcset="https://admin.time.mn/wp-content/uploads/2025/04/h8obzv_Screenshot_20230402-202533_YouTube_x974-1024x559.jpg 1024w, https://admin.time.mn/wp-content/uploads/2025/04/h8obzv_Screenshot_20230402-202533_YouTube_x974-300x164.jpg 300w, https://admin.time.mn/wp-content/uploads/2025/04/h8obzv_Screenshot_20230402-202533_YouTube_x974-768x419.jpg 768w, https://admin.time.mn/wp-content/uploads/2025/04/h8obzv_Screenshot_20230402-202533_YouTube_x974-1536x838.jpg 1536w, https://admin.time.mn/wp-content/uploads/2025/04/h8obzv_Screenshot_20230402-202533_YouTube_x974.jpg 1600w" sizes="auto, (max-width: 1024px) 100vw, 1024px" /></figure> </figure> <p>&nbsp;&nbsp;&nbsp; Тэгэхэд А.Ананд форм муутай, лигт муу тоглож байсан. Э.Дөлгөөн, Д.Дэлгэрням нар “Бид аварга болно” гээд PSN телевизэд ярилцлага өгч, “Тэрийг хожоод, зөрлөг дээр Казахстан ирэх байх. Дараа нь Шинэ Зеланд, тэгээд Австралитай аваргын төлөө тоглоё доо” гэсэн. 10 хоногийн дараа тэрийгээ биелүүлсэн шүү дээ. Хүн чадах юмандаа итгэх хэрэгтэй. <em>Чи чадаж байна, болж байна, бүтэж байна гээд Монголд нь онгоцонд суулгахгүй, 4 уулын жалганд үлдээчхээд, өөрсдөө чадна гэж яваад хожигддогийг үзэгчид ч ойлгохгүй байна. Би ч ойлгохгүй байна.</em></p> <p>&#8211;<strong>Та цаашдаа яах гэж байна. Хэрвээ Монголдоо дасгалжуулагчаар ажиллаж чадахгүй бол гадагшаа явах уу? Узбекистан, БНХАУ-аас санал ирсэн гэж сонссон.</strong></p> <p> <strong><em>Надаас олон хүн асууж байгаа. Узбекистан, Хятадын багаас санал ирсэн. Гэхдээ би явлаа гэхэд юу болохыг улаан цагаан мэдэж байгаа. Байшинг минь шатаах гэж байна шүү дээ. Ингээд хоёрдчихоод байна. Өөрөө өөртөө нэг л юманд гайхаад байна. Хийсэн бүтээсэн бүх юмыг нь хүн шатаах гээд байхад чи хаяж зугатаагаад, “Дараа нь босгоё” гэх боломжгүй шүү дээ. 3х3 сагсан бөмбөгийг шатаагаад нураах гэж байгаа учраас би эргэлзээтэй байдалд байна.</em></strong></p> <p>Цаашдын гэрэл гэгээтэй ирээдүйгээ бодож, энэ ярилцлагыг өглөө. 3х3 сагсан бөмбөг гэхээр Монголын талаар ярьдаг. Чингис хааны байлдааны тактиктай, цэвэр монгол сагсан бөмбөгчид маань эв зүйгээ олоод ажиллах ёстой. Үүний тулд Монголын том дарга нар, удирдлагуудад санал хүсэлт тавьж байна. “Монгол гэсэн 6 үсэгтэй бурхан нэрээр Дэлхийд гоёдог” гэдэг. Багаараа, хамтаараа энэ спортыг хагарал, тэмцэлгүйгээр эв нэгдэлтэйгээр хөгжүүлье гэж уриалж байна.</p>