Монгол Улсын Засгийн газраас хэрэгжүүлж байгаа “Атар IV” аяныг Төв аймаг Архуст сумаас эхлүүллээ. Өчигдөр тус суманд тариаланчдын зөвлөгөөн хийж, “Техникийн парад” зохион байгууллаа.
“Техникийн парад”-ыг хаврын тариалалт, намрын хураалтын үед ажиллах хүч болж, газар тариалангийн бүс нутагт очиж байгаа “Илгээлтийн эзэд”-ээр төлөөлүүлэн зохиомжилжээ. Мөрөвчтэй өмд, хээнцэр алчуураар гоёсон охид, саравчтай малгай, өнгө өнгийн хүрмээр жигдэрч, гитар барьсан залуус “ЗИЛ 130” дээр суужээ.
“Техникийн парад”-д Архуст сумын 100 гаруй трактор, комбайны 40 орчим хувийг нь оролцуулав. Хамгийн сонирхолтой нь уг парадад “Атар” I, II, III аянд зүтгэж, нормоо үлгэр жишээ биелүүлсэн тракторыг энэ жагсаалын түрүүнд явууллаа.
