Монгол улсын Ерөнхий Сайд Л.Оюун-Эрдэнэ АТГ-ын даргаар З.Дашдавааг улираан томилуулах саналаа засгийн газрын гишүүдэд танилцуулсан. Тэгвэл УИХ дах МАН-ын бүлэг хуралдаж мөн энэ шийдвэрийг дэмжсэн байна. АТГ-ын дарга З.Дашдаваа сэтгүүлчдийн асуултад хариуллаа

-Авлигын төсөөллийн индексээр манай улс яагаад ийм хойгуур эрэмбэлэгдэж байна вэ ?

-Монгол Улс авлигын төсөөллийн индексээр 180 орноос 110-т эрэмбэлэгдэж байгаа. Олон улсаас ийм л зөвлөмжүүдийг өгдөг. Нэгд, улс төрийн намын санхүүжилтийг ил тод болго, хоёрт, шүгэл үлээгчийн хуулиа боловсронгуй болго, гуравт худалдан авах ажиллагааны тухай хууль чинь болохгүй байна, дөрөвдүгээрт төрийн өмчит компаниудын засаглалыг ил тод байлгах гэх мэт зөвлөмжийг өгдөг. Бид энэ зөвлөмжийг хүлээн авч 2023 онд авлигын эсрэг 8 жил хэрэгжих үндэсний хөтөлбөрөө батлуулж чадсан. Энэ хөтөлбөрийн хүрээнд авлигатай тэмцэх ажил үргэлжилж байна. Ер нь авлигын төсөөллийн индекс тавиас дээш индексийг зүүн европын өндөр хөгжсөн улс орнууд л авдаг.Төрийн худалдан авалт хөгжиж буй улс оронд их байдаг учраас шууд зогсоох боломжгүй юм билээ. Нэгэнт л сургууль барих шаардлагатай, цэцэрлэг барих шаардлагатай энийг төр худалдан авч хийхээс өөр арга байхгүй. Тавиас дээш оноо авч байж л авлигатай бүрэн тэмцэж байна гэж үздэг. Манайд бол төрийн оролцооны асуудал буурахгүй байгаа нь ийм оноо авахад гол тээг болж байна.

-Та тасралтгүй 6 жил ажиллалаа. Өөрийгөө хэр сайн авлигатай тэмцсэн гэж бодож байна вэ ?

-Энэ хугацаанд улс хэмжээнд яригдсан авлигын онцлог хэргүүд их олон гарлаа. Эрдэнэтийн 49 хувь, нүүрсний хэрэг, Хөгжлийн банкны хэрэг байна. Бид сэтгүүлчид болон олон нийттэй хамтран хөгжлийн банкийг дампуурлаас аварч чадсан шүү дээ.

-Авлигын гэмт хэрэгт холбогдсон улстөрчдийн хэрэг сүржин зарлагддаг ч яаж шийдэгдсэн нь тодорхойгүй байдаг ?

-Эрүүгийн хэрэг хянан шийдвэрлэх тухай хуулиар Прокурорын зөвшөөрлөөр тодорхой мэдээллийг өгөх ёстой. Гэхдээ авлигын гэмт хэрэг бол илрүүлэхэд цаг хугацаа их шаарддаг.Авлигатай тэмцэх газар бол онцгой комисс биш. Өнөөдөр илрүүлээд маргааш шийддэггүй. Хүний гэм буруугийн асуудал бол ээдрээтэй, хоёр талын мэтгэлцэж байж нотолж тогтоодог. Жишээ нь нүүрсний хэрэг бол гурван шатны шүүхээр ороод шийдвэрлэгдлээ.Шүүхийн процесс бол өөрөө хуультай дүрэмтэй.

–Авлигын гэмт хэрэг холбогдсон улстөрчид эргээд төрийн өндөр албан тушаалд томилогдох тохиолдол байсаар байна ?

-Шүүхээр эцэслэн гэм бурууг нь тогтоосны дараа л тухайн хүний нийтийн албанд ажиллах эрх нь хасагдаж байгаа шүү дээ.

–Ирэх 6 жил та авлигын гэмт хэргийн эсрэг хэрхэн яаж ажиллах төлөвлөгөөгтэй байна вэ ?

-Би бол өөдрөг төсөөлөлтэй байна. Авлигын төсөөллийн индексээс манай улс өгч байгаа зөвлөмжийг бид үндэсний хөтөлбөрөө шингээчихсэн. Ер нь ирэх жилүүдээс авлигын төсөөллийн индекс өсчихсөн, байр бол урагшилчихсан байна гэсэн төсөөлөлтэй байна.