Пүрэв гарагт Дэлхийн худалдааны байгууллага үүсгэн байгуулагдсаны 30 жилийн ойн арга хэмжээ тус байгууллагын төв байр байрладаг Швейцарийн Женев хотноо зохион байгуулагдлаа.

ДХБ-ын 30 жилийн ойн арга хэмжээний үеэр оролцогч гишүүд олон талт худалдааны тогтолцооны түүхэн ололт амжилтыг дүгнэж, ДХБ-д эдүгээ тулгарч буй сорилтууд болон цаашдын шинэчлэлийн чиглэлийн талаар хэлэлцжээ.

Арга хэмжээний үеэр Швейцарь, Сингапур зэрэг жижиг, дунд 41 эдийн засгийн цогцууд хамтран “Олон талт худалдааны тогтолцооны хамтрал” хэмээх санаачилгыг нийтлэсэн байна.

Уг санаачилгад сүүлийн 30 жилийн хугацаанд дэлхийн худалдааг чөлөөтэй болгох, хөгжиж буй орнуудыг дэлхийн эдийн засагт нэгтгэхэд ДХБ-ын гүйцэтгэсэн чухал үүргийг бүрэн хүлээн зөвшөөрч, өнөөгийн олон талт худалдааны тогтолцоо нь дэлхийн нийлүүлэлтийн гинжин хэлхээний тасалдал, худалдааны протекционист үзэл газар авч даамжирч байгаа зэрэг ноцтой сорилтуудтай тулгарч байгааг онцлон тэмдэглэв.

Түүнчлэн энэхүү санаачилгад худалдааны нээлттэй байдлыг хадгалж, ДХБ-ын шинэчлэлийг шинэлэг арга замаар хамтдаа ахиулж, тулгарч буй сорилтуудын эсрэг дорвитой арга хэмжээ авч, ДХБ-аар гол болгосон олон талт худалдааны тогтолцооны үндсэн үүргийг хамгаалахыг талуудад уриаллаа.

ДХБ-ын ерөнхий захирал Нгози Оконжо-Ивеала дүгнэлтдээ ДХБ-ын платформыг эрхэмлэн нандигнаж, худалдаагаар дамжуулан хөгжил, аюулгүй байдлыг дэмжиж, ДХБ-ын шинэчлэлийг инновацид суурилсан шинэлэг арга замаар ахиулахыг гишүүн орнуудад давхар уриалсан байна.

Эргэн сануулахад, 1994 оны 4-р сарын 15-ны өдөр байгуулагдсан Марракешийн гэрээгээр Дэлхийн худалдааны байгууллагыг үүсгэн байгуулж байсан бөгөөд 1995 оны 1-р сарын 1-ний өдрөөс тус байгууллага албан ёсоор үйл ажиллагаагаа эхлүүлж байсан юм.

Олон улсын худалдааг либералчлах, гишүүн орнуудын худалдаа, улс төрийн харилцааг зохицуулах зорилготой тус байгууллагад өнөөдрийн байдлаар дэлхийн 166 улс гишүүнээр нэгдэн орсон байдалтай байна.