Засгийн газрын ээлжит хуралдаанаар төрийн өмчит компаниудын засаглалыг сайжруулж, үр өгөөжийг дээшлүүлэх үүднээс нэр бүхий 17 компаниудыг цөөлөх, 9 компанийг татан буулгаж нэгтгэх, мөн компаниудын захирлын цалин хөлс, урамшууллын системийг өөрчлөх талаар Засгийн газарт танилцуулсан байна.

Төрийн өмчийн бодлого, зохицуулалтын газрын дарга Б.Цэнгэл: 2024-2028 онд 20 компанийг үндсэн чиглэлд оруулах санал боловсруулсан. Тухайлбал “Эрдэнэт” үйлдвэр, “Эрдэнэс Тавантолгой ХХК”, эрчим хүчний 11 компани, “Миат” ХХК, “Төрийн банк”, “Хөдөө аж ахуйн бирж” зэрэг 20 компаниудын 10-66 хүртэлх хувийг монголын болон гадаад дотоодын хөрөнгийн биржээр дамжуулж олон нийтийн нээлттэй болгох, хувьцаа гаргах саналыг оруулсан. Энэ үндсэн чиглэлийг хэрэгжүүлснээр 3,74 их наядын орлого төвлөрүүлэх боломж байна гэж үзэж буй. Төрийн өмчит компаниудын засаглалыг сайжруулах, давхардсан чиг үүргийг өөрчлөх үүднээс Нэр бүхий 17 компаниудыг цөөлөх, 9 компаниудыг татан буулгаж, бүтцийн өөрчлөлт хийх, нэгтгэх саналыг танилцуулсан. Тодруулбал Ховд, Увс Дөргөний усан цахилгааны станцыг нэгтгэх, Алтай Улиастай салбар болон бусад түгээх салбаруудыг нэгтгэх, Шингэн түлш ачих байгууламжийг “Эрдэс ойл” компанитай нэгтгэх арга хэмжээг ойрын үед авч хэрэгжүүлэхээр санал танилцууллаа.

Төрийн өмчит компаниудын хангамжийн асуудал, захирлыг үнэлэх үнэлгээ, цалин хөлсийг үнэлэх шалгуурыг өөрчлөх талаар олон улсын байгууллагатай хамтран ажиллаж байна. Үндсэн цалин нь өндөр биш жилийн эцсээр ажлын үр дүнгээр урамшуулал олгодог байх тогтолцоо бүрдүүлэх талаар танилцуулсан. Өнөөдөр төрийн өмчит компаниудын захирал хамгийн ихдээ 30 сая төгрөгийн цалин авч байна. “Эрдэнэс Монгол” “Эрдэс тавантолгой”, “Хөдөө аж ахуйн бирж”, “Миат” ХХК зэрэг компаниудын захирлын нэг сарын дундаж цалин бусад төрийн өмчит компани, салбарын дундаж цалингаас өндөр байна. Харин “Монгол шуудан”, “Монголын цахилгаан холбоо” “Монгол кино нэгтгэл”, Үндэсний шигшээ багийн бэлтгэл сургуулилтын төвийн захирлуудын сарын цалингийн дундаж 940- 1 сая 300 мянган төгрөгийн хооронд байна гэв.