Цаг уур орчны шинжилгээний газрын харьяа байгууллага болон ус цаг уурын байгууллагын ажилтнуудын тоог цомхотгосон талаар мэдээлэл гарсан. Тэгвэл энэ талаар Цаг уурын орчны шинжилгээний газрын дарга Э.Баттулга тайлбар мэдээлэл өглөө.

Цаг уурын орчны шинжилгээний газрын дарга Э.Баттулга: ЦУОШГ нь Монгол улсын 21 аймаг, 318 сум суурин газарт салбар нэгжтэй. Манай байгууллагад нийтдээ 1893 албан хаагч ажилладаг. Монгол улсын 2025 төсвийн тодотголыг батлахдаа орон тоо цалингийн санг 9 хувиар цомхотгосон. Манай батлагдсан төсөв 2025 онд 80,4 тэрбум төгрөг байсан бол 74,3 тэрбум төгрөг болсон. Энэ хүрээнд 1893 албан хаагч 171-ээр цөөрч буй. Наймдугаар сарын 01-нээс төрийн албан хаагчийн цалингийн нэгдсэн сан батлагдсан дээд хязгаарт багтаж олгох бүртгэлийн шинэчлэл хийгдсэн. Үүнтэй холбогдуулан бид бүтцийн өөрчлөлт хийсэн.

Ингэхдээ бүх 21 аймгийн төвүүдийн саналыг авч, үүн дээр үндэслэн газрын даргын тушаалаар 7 хүний бүрэлдэхүүнтэй ажлын хэсэг сар гаруй хугацаанд ажилласан.

Анхан шатны нэгж буюу ажилтны тоог цөөрүүлэхгүй, хөндөхгүй байх зарчим баримталсан. 318 өртөөний 134 нь цаг уурын өртөө байдаг. Хөдөө аж ахуйн өртөөн харуул 183 байдаг. Зарим аймагт өртөө буюу 5 хүний бүрэлдэхүүнтэй баг, зарим аймагт 1 хүний харуул ажилладаг. Цаг уурын өртөө харуул дээр өөрчлөлт ороогүй. Харин удирдах албан тушаалтны тоог цөөлсөн. Нэг төв дээр 3 хэлтсийн даргатай байсныг нэг болгож 63 удирдах албан тушаалын орон тоог цөөлсөн. Өөрөөр хэлбэл цомхотголд орсон 171 алба хаагчаас 63 нь удирдах албан тушаалын хүмүүс гэв.