Хичээлийн жил эхлэх гэж байгаатай холбогдуулан гэмт хэрэг, зөрчил, зам тээврийн ослоос урьдчилан сэргийлэх талаар цагдаагийн байгууллагаас мэдээлэл өглөө.

Цагдаагийн байгууллагын 5200 орчим албан хаагч 9 дүгээр сарын 1-4-ний өдрүүдэд сургуулийн орчимд эргүүл, хяналт шалгалт хийж, аюулгүй байдлыг хангахаар болжээ. Үүний дараа улсын хэмжээнд 885 орчим сургуульд гэмт хэргээс урьдчилан сэргийлэх хичээл орох юм байна.

ЦЕГ-ын Хүүхдийн эсрэг гэмт хэргээс урьдчилан сэргийлэх албаны хэлтсийн дарга, дэд хурандаа Д.Будзаан:

-Гэмт хэргээс урьдчилан сэргийлэх ажлыг сургууль, боловсролын байгууллагууд хийх үүрэгтэй. Жил бүрийн ес болон аравдугаар сард цагдаагийн байгууллагад ирэх дуудлага нэмэгддэг. Тодруулбал эцэг эхчүүд, хүүхдүүдийн хооронд хичээл давтуулах, гэрийн даалгавар хийлгэхтэй холбоотой зөрчил үүсэж, цагдаагийн байгууллагын 102 болон хүүхэд хамгааллын 108 дугаарын утсанд дуудлага их ирдэг. Тиймээс эцэг, эхчүүд хүүхдийнхээ хичээлийг давтуулахдаа эерэг арга хэрэглэж, хүүхдийнхээ онцлогт тохирсон аргаар хичээлийг нь хийлгэх хэрэгтэй.

Мөн хөдөө ахлах ангийн хүүхдүүдэд мотоцикл унуулж, сургуульд нь явуулдаг. Тиймээс энэ асуудал дээр хяналт шалгалтыг эрчимжүүлнэ. Тээврийн хэрэгсэл жолоодох эрхгүй хүүхдүүдэд тээврийн хэрэгсэл өгөх, жолоодуулахгүй байхад эцэг эхчүүд онцгой анхаарах шаардлагатай.

Хүүхэд хамгаалагчаар ахмад настнууд ажиллаж буй. Улсын хэмжээнд 450 гаруй хамгаалагч ажиллаж байгаа. Эдгээр хүн гэмт хэргээс урьдчилан сэргийлэхийг иргэдээс шаардах эрхтэй. 1 эцэг эх жилдээ 1-2 удаа сургуулийн эргүүлээр ажилладаг. Хотын хэмжээнд 2050 эцэг эх өдөр бүр замын болон хэв журмын эргүүлээр ажиллаж байгаа. Эцэг эхчүүдийн тавьж буй шаардлагыг жолооч нар хүндэтгэн, замын хөдөлгөөндөө болгоомжтой оролцоорой.