Хүүхэд, гэр бүлийн хөгжил, хамгааллын ерөнхий газрын дарга Б.Баярсайхан өнөөдөр дараах мэдээллийг өглөө.

Б.Баярсайхан:

-Өнгөрсөн жил улсын хэмжээнд хүүхдийн эсрэг үйлдэгдсэн гэмт хэргийн 70,1 хувь нь гэр бүлийн орчинд гарчээ. Хүүхэд хамгааллын 108 утсанд жилдээ 103 мянга гаруй дуудлага ирж байгаагаас 30 гаруй хувьд нь хэрэг нээж, тусламж үзүүлж байна. Гэртээ гэмтэж бэртсэн, хүчирхийлэлд өртсөн хүүхдийн тоо 35 мянгад хүрсэн. 371 хүүхэд бэлгийн хүчирхийлэлд өртсөн. Хүүхэд төрүүлж буй нийт эмэгтэйчүүдийн 3,5 хувийг охид эзэлж байна. Өнгөрсөн жил 12-17 насны 560 охин үр хөндүүлсэн.

Хамгийн сүүлд НҮБ-ын Хүүхдийн сан, ДЭМБ хүүхдүүдээс судалгаа авсан юм. Эцэг, эх сүүлийн нэг сар биднийг юу хийж байгааг мэдэхгүй байгаа гэж 3 хүүхэд тутмын 2 нь хариулсан. 2 хүүхэд тутмын 1 нь өөрсдийнх нь асуудалд огт санаа зовдоггүй, асуудаггүй гэж хариулсан. Мөн 12-17 насны 5 хүүхдийн 2 нь амиа хорлох тухай бодсон, 10 хүүхэд тутмын 1 нь амиа хорлохыг оролдсон гэж хариулжээ. Түүнчлэн 4 хүүхэд тутмын 1 нь “Сүүлийн нэг сар электрон тамхи татсан. Үүнийг эцэг эх маань мэдээгүй” гэж хариулсан. Хүүхдийн эсрэг үйлдэгдэж байгаа хүчирхийлэл гэр бүлийн орчинд байгааг анхааруулж хэлмээр байна.