Өнөөдөр Ардчилсан намын Үндэсний бодлогын хороо хуралдаж шинэ даргаа сонгоно. Яг одоо Төрийн ордонд ҮБХ-ны ээлжит бус хурал болж байна. Уг хурал дээр 4 нэр дэвшигчид өөрсдийн мөрийн хөтөлбөрөө танилцуулах юм.
Тус намын даргын сонгуульд УИХ-ын гишүүн, УИХ дахь Ардчилсан намын бүлгийн дарга О.Цогтгэрэл, УИХ-ын дэд дарга Б.Пүрэвдорж, УИХ-ын гишүүн Ж.Баярмаа, ҮБХ-ны гишүүн Б.Отгонбат нар өрсөлдөж буй. Нэр дэвшигчид өчигдөр NTV телевизээр 90 минутын турш шууд мэтгэлцсэн.
Нэр дэвшигчдийн хэлсэн үгнээс хүргэж байна.
О.Цогтгэрэл: Шинэ Монголоо цуг бүтээнэ. Бүхий л салбарт олон том шинэчлэлт, өөрчлөлт хийхээр хуримтлагдан, хүлээгдэж байгаа. Үүнийг гагцхүү АН хийж чадна.
Ж.Баярмаа: Би дарга болбол манлайлдаг дарга байна. Гэхдээ ганц даргаас бүх зүйл хамаарахгүй. Ардчилсан нам өөрөө нам шиг нам байж засаглаж чадна.
Б.Пүрэвдорж: Төрийн нэрээр хулгай хийсэн хулгайч нарт маш хатуу хариуцлага тооцох болно.
Б.Отгонбат: Авлига, утаа, ажилгүйдэл, ядуурлыг Ардчилсан нам эргүүлж чадна. Тиймээс АН-д үйлчилье, ажил хийе гэж нэр дэвшиж байна.