Иргэн А.Шижирбаатарынх ам бүл 6-уулаа. Тэд 3 охинтой. Охидын хамгийн том нь 6 настай. Энэ гэр бүлд баяр хөөр, аз жаргал, эд хөрөнгө бүхий л зүйл байсан. Харин хүүтэй болохыг тэсэн ядан хүлээж байжээ. Тэдний хүсэл 2024 онд биелж, хөөрхөн хүүтэй болсон тухай мэдээг ЭХО-ны эмчээс дуулжээ. Үүнээс 6 сарын дараа эхнэрийг нь дэлгүүр орох гэж явтал, нохой дайрчээ. Эхнэр нь айж, цочролд орсны улмаас умай доторх ус нь гарч, ураг аюулд оржээ. Эхийн ус хэт их гарсны улмаас ураг хүчилтөрөгчгүй болсон тул эмч нар яаралтай хийсвэр хагалгаа хийж, ургийг гаргаж авсан байна. Ингээд 6 сартай 900 гр хүү мэндлэхэд, аав ээж нь хязгааргүй их баярлаж, удам залгах хүүгээ өлгийджээ.

ЯРИЛЦЛАГЫГ ҮЗЭХ БОЛ ЭНД ДАР

Харамсалтай нь 2 сарын хугацаанд Эрчимт эмчилгээний тасагт эмчилгээ хийлгээд гарсан хүүхэд хүчтэй татан, тархины дөрвөл хөшүүн саа (G80.0), угсарсан уналт таталт гэсэн хавсарсан оноштойгоор 10 сар эмчлүүлж байна. Ш.Галбадрах хүү өмнө нь нэг хоног өнжөөд, татдаг байсан бол одоо ойр ойр угсраад татдаг болжээ. Удаа дараа угсарч татвал тархи үхжих, зүрх зогсох ноцтой аюултай юм.

Гэтэл хүүгийн энэ өвчнийг Монголд эмчлэх боломжгүй. Шалтгаан нь тархины үйл ажиллагааны зураглал хийдэг төхөөрөмж Монголд байхгүй, тархи хэдэн хувь ажиллаж байгааг мэдэх бололцоогүй гэж эмч нар эцэг эхэд нь тайлбарлажээ. Тиймээс аль болох хурдан гадаад явахыг зөвлөсөн байна. Энэ төрлийн хагалгааг аль болох эрт, бага насан дээр нь хийх ёстой байдаг юм байна. Ялангуяа хүүхдийн сэтгэл хөдлөл, мэдрэмж бүрэн суухаас өмнө. Хүүгийн ээж Ц.Төрмандах хүүгээ ой хүрэхээс өмнө хагалгаанд оруулж, хөл дээр нь босгон, ядаж л өөрөө хоолоо иддэг болгохыг хүсэж байна.

10 сартай Ш.Галбадрах хүү 900 гр жинтэй төрсөн. Одоо өдрөөс өдөрт жин хасаж, нярайдаа өмсөж байсан хувцсаа өмсөх болжээ. Хүү зөвхөн гуурсаар сүү уудаг. Өөр хоол идэх боломжгүй. Тиймээс авах ёстой шим тэжээлээ огт авч чаддаггүй гэж хэлж болно. Мөн 12 нэр төрлийн эм хэрэглэж байгааг аав А.Шижирбаатар нь ярив. Үүнд таталтын эсрэг, тайвшруулах, өвчин намдаах зэрэг эм багтана. Эдгээр эмийг уухгүй л бол алхаар толгой руу нь цохиж байгаа мэт хүчтэй өвдөлт мэдрэгддэг гэж эмч тайлбарлажээ. Мөн хүүгийн нүд нь бүлтийн, инээж байгаа мэт харагдах боловч энэ нь үнэн хэрэгтээ эмийн нөлөө гэнэ. Эмээ уувал хүү тайвширч, унтдаг. Бусад үед унтаж чаддаггүй байна.

БНСУ-д хагалгаа хийлгэвэл хүүгийн өвчин эдгэх магадлал 80-90% аж. “Таталт арилвал ирээдүйтэй” гэж хүүгийн ээж ярьсан юм. Хэрвээ татахгүй болчихвол Монголдоо сэргээн засах эмчилгээ хийлгэх боломжтой. Одоогоор сэргээн засах төвүүд Ш.Галбадрах хүүг хүлээж авахгүй байгаа аж. Учир нь хүнд бариа заслыг хүүгийн бие дийлэхгүй гэжээ.

Галбадрах хүү 3 эгчтэй. Хамгийн том эгч нь 1 дүгээр ангийн сурагч. Дунд эгч нар нь цэцэрлэгт явдаг. Тэд өдөр бүр дүүгээ эрхлүүлж тоглодог. Мөн ээждээ их тус дэм болдог. Эгч нар нь дүүгээ өвдсөнийг мэдээгүй. “Яагаад ярихгүй, мөлхөхгүй байгаа юм бол” гэж их асуудаг гэнэ. Сүүлийн үед том эгч нь бага багаар гадарлаж эхэлжээ. 2 дүү нь эрүүл саруул өссөн учраас бага дүүгээ яг л эгч нар шигээ эрүүл өснө гэж тэр бодож байгаа нь гарцаагүй. Гэхдээ ийм бяцхан хүүхэд жижигхэн биедээ баймгүй их тэвчээр гаргаж буйг харахад, хэний ч сэтгэл өвдөнө. Хэрвээ тэр өдөр хүүгийн ээж дэлгүүр ороогүй бол, нохой дайрч айлгаагүй бол өнөөдөр Ш.Галбадрах хүү эрүүл саруул өсөж, эгч нартаа эрхэлж, үеийн хүүхдүүд шигээ сууж, хоолоо идэн, мөлхөж байх байлаа.

Хүүгийн аав, ээж өнгөрсөн 10 сарын хугацаанд цалингийн зээл авч, орон байраа зарж, өөрсдөдөө байсан бүхий л зүйлээр дэнчин тавин, хүүгээ эмчлүүлж байна. Одоо тэд ганцхан “Приус” маркийн машинтай үлджээ. Одоогоор дүүгийнхээ хашаа, байшинд амьдарч байна.

Тэд хүүтэй болохдоо маш олон зүйл бодож, хүсжээ. Тухайлбал: Анхны хүү, одонгийн хүүхэд. 2 талын эмээ нараас хойш одонгийн хүүхэд төрөөгүй гэх зэргээр бэлгэшээж, маш их хүсэж, хүлээж байжээ. “Гэвч “Хүсвэл хясна” гэдэг шиг хэт их хүсчихсэн байж” гэж ярих ээж хүүгээ яаралтай эмчилгээнд явуулж, эдгээхийг хүсэж байна.

БНСУ-д хийлгэх хагалгаанд 80 сая вон буюу 200 сая төгрөг шаардлагатай. Эцэг эх нь ах дүү, хамаатан садан, найз нөхөд, ажлын хамт олноосоо хүртэл тусламж хүсэж, байгаа бүхнээ зориулсан ч энэ мөнгийг бүрдүүлж чадахгүй учраас аргагүйн эрхэнд Монголынхоо ард түмнээс тусламж хүссэн юм. 10 сартай Ш.Галбадрах хүүд туслахыг хүсвэл хүүгийн гэр бүлтэй холбогдож болно.

Холбоо барих дугаар:

Аав Авирмэдийн Шижирбаатар: 91689898, Ээж: 96063005

Хандивын данс: 5312131693 Хаан банк, Авирмэд Шижирбаатар