“Нэг гэр бүлийн 6 хүн өглөө нь дахиж сэрээгүй” гэдэг мэдээлэл нийгмийг цочроож байна. Урьдчилсан байдлаар угаартаж нас барсан гэдэг нь тогтоогдсон. Эргэн сануулбал өнгөрсөн нэгдүгээр сарын 23-24-нийг шилжих шөнө Баянгол дүүргийн 22-р хороонд 6-51 хүртэлх насны 6 хүн амиа алджээ. Энэ мэдээлэл гарснаас хойш том хүү О.Одбаяр нь өчигдөр /2025.02.06/ хэвлэл мэдээлэлд хандаж, хайртай хүмүүсээ харамсалтайгаар алдаад байгаа тухайгаа ярьсан.
Үүний араас талийгаачийн гэр бүлийг архины хамааралтай байсан, хулгайн хэрэгт холбогдож байсан гэх зэргээр нийгэмд муугаар харлуулж эхлэв. Хамгийн гол нь хүний хувийн мэдээллийг олон нийтэд ил болгосон нь олон нийтийг бухимдуулав. Энэ төрлийн хувийн мэдээллийг хууль хяналтын байгууллагаас өөр жирийн иргэн мэдэх боломжгүй юм. Гэтэл цагдаагийн хэргийн протокол мэт мэдээллийг цагдаа эсвэл өөр төрийн албаны хэн нэгэн ямар нэг зорилготойгоор гаргасан байж таараа. Хамгийн гол нь ямар хүн ийм мэдээллийг албан бусаар олон нийтэд цацсаныг цагдаагийн байгууллага шалгаж байгаа аж. Үүнтэй холбоотойгоор Хууль, зүй дотоод хэргийн сайд О.Алтангэрэл мэдээлэл хийв. Ингэхдээ цагдаагийн байгууллага тухайн мэдээллийг тараасан бол хариуцлага тооцоод зогсохгүй, цагдаагийн байгууллагын удирдлагууд давхар хариуцлага хүлээх ёстой гэдэг тайлбар хийсэн юм.
Үүнтэй зэрэгцээд бид Баянгол дүүргийн 22-р хороог зорив. 11 цагийн үед бид зорьсон газраа хүрэхэд эл хуль модон хашаан дотор нэг байшин, нэг монгол гэр барьсан байв. Ажил явдлыг нь хийхдээ илүү гэр барьсан байжээ. Харин гэрийн урд хоёр гөлөг хэвтэнэ. Өөр хүн энд харагдсангүй. Мөн гэрийн хажууд “Нүүдэлчин” зуух тавьсан байлаа. Тухайн зуухыг илүү гэрт тавьж галласан ч сайн халахгүй байсан учраас гадаа гаргасан байжээ.
Ингээд бид мэдээллийг тодруулах үүднээс харьяа хороо руу очиход нийгмийн ажилтан, хорооны засаг дарга байхгүй, семинарт явсан гэдэг шалтгаанаар хоосон хаалга мөргөв. Улмаар буцаж явахдаа О.Одбаярын нагац ахтай таарсан юм.
Түүний хэлснээр наймуулаа нэг байшинд амьдардаг байжээ. Нагац ах “О” нь тухайн өдөр айлд хоноод маргааш өглөө нь мэдсэн байна. Нас барсан хүмүүс дунд түүний охин байжээ. Тэрээр аз, хувь тавилан гэдэг нь юм уу? Би өөр айлд хонож таарсан. Хэрвээ цуг хоносон бол 6 хүний тоо 7 болохыг ч үгүйсгэхгүй. Миний охин тэр дунд байсан. Цагдаа нар 01:30-03:30 цагийн хооронд хэрэг гарсан гэсэн. Шинжээч хүмүүс хүүрийн толбыг нь хараад манай охиныг “Үүд рүү мөлхөж, амь тэмцсэн байна” гэж хэлсэн. Харин “Ээж нь унтаж байгаа юм шиг, хоёр жаахан нь атиралдаад хэвтчихсэн байсан” гэж хэлсэн. Үнэхээр харамсалтай байна. Түүхий нүүрс утаа гардаг, угаар нь хурц үнэртдэг. Энэ шахмал түлш огт тэгж үнэртэхгүй. Өмнө нь авдаг байсан сайжруулсан түлш бөөрөнхий, бүтэн ирдэг байсан чинь сүүлд ирж байгаа түлш дөрвөлжин, бутарчихсан байна. Дээр нь тортог их, чийгтэй байдаг” гэж ярив.
Иргэн О ийнхүү ярьсан бол бид ойр орчмын хөршүүд болон худалдаа, үйлчилгээ явуулдаг хүмүүсээс тэдний талаар тодруулсан юм.
Ойролцоох худгийн ус түгээгч “Би энэ хороонд 40 жил амьдарч байна. Талийгаач гэр бүлийг сайн мэднэ. Үнэхээр их харамсаж байна. Маш хэцүү зүйл тохиолдлоо. О.Одбаяр манай охинтой нэг анги, нэг сургуульд явдаг байсан. Ааш зангийн хувьд төлөв даруу, сайн хүү. Ээжийг нь ч би мэднэ. Их боловсролтой, ажилсаг эмэгтэй байсан. Архины хамааралтай хүн биш. Тийм айл ч биш. Хувь хүний тухай худал ташаа мэдээлэл тарааж болохгүй шүү дээ. Ямар хүмүүс нь тийм зүйл тараадаг байна. Одоо үлдсэн ганц хүүг нь өндөр боловсролтой, ажилтай болоход дэмжлэг үзүүлээсэй” хэмээн ярив.
Энэ зуур бид том хүү О.Одбаярынх нь найзтай уулзсан юм. Тэд багаасаа нөхөрлөсөн, нэг дэнжийн найзууд аж. Тэрээр хамгийн сүүлд цэрэгт явахаас өмнө найзтайгаа уулзжээ. “Бид найзлаад удаж байна. Би ээж, дүү нарыг нь бүгдийг нь мэднэ. Хааяа тэднийхээр орж гардаг байсан. Манай найз ээж, дүү нартаа маш хайртай. Дүү нар нь ээждээ тусалдаг, хөөрхөн хүүхдүүд байсан. Найз маань зүгээр л амьдрахын төлөө зүтгэж яваа, жирийн нэг залуу. Цахим орчинд явж байгаа шиг архичин, хулгайч биш” гэв.
Үүний дараа бид ойролцоох сайжруулсан шахмал түлш борлуулагчаас зарим мэдээллийг тодруулав. Тэрээр мөн л дээрх хариултуудыг хэлж байлаа. “Талийгаач ах нь манайхаас түлш их авдаг. Манайхыг хаасан үед өөр газраас авдаг байх. Хүнд гэмгүй хүмүүс байсан. Ээж нь ч гэсэн. Хүүхдүүдээ сургуульд хүргэж өгөх гэж яваад таарахдаа “Сайн байна уу?” гээд мэнд устай зөрдөг. Тийм л хүмүүс. Архины хамааралтай байсан гээд худлаа яриа яваад байна лээ. Архины хамааралтай байсан бол андашгүй, шууд мэдэгдэнэ. Гол нь тийм биш. Хүмүүс их муухайгаар ярьж байна. Тэгж болохгүй шүү дээ” гэв.
Яг ийм байдлаар сүүлийн 6 жилд 800 хүн гэртээ байхдаа угаартаж амь насаа алджээ. Магадгүй дахиад өөр хэн, хэзээ өнөөдөр унтаад, маргааш сэрэхгүй байхыг таашгүй нийгэмд бид амьдарч байна. Иргэдийн чинь амь энэ улсад үнэ цэнгүй болсон уу?