Засгийн газрын хуралдаанаар Ж.Батзанданг Стратегийн ач холбогдол бүхий ашигт малтмалын ордын тусгай зөвшөөрөл эзэмшиж байгаа хуулийн этгээдтэй хэлэлцээ хийх Засгийн газрын Бүрэн эрхт төлөөлөгчөөр томилсон. Энэ талаар тэрээр мэдээлэл өглөө.

     Тулгамдсан маш олон асуудлууд байгаа. Би ганцхан жишээг дурдъя. Нарийн Сухайтын бүлэг орд бий. Стратегийн орд. Үүнийг 7 компани эзэмшиж байгаа. Өөрөөр хэлбэл Нарийн Сухайт дээр 7 компанитай хэлцэлд орно гэсэн үг. Тавантолгойн бүлэг ордыг 4 компани эзэмшиж байгаа. 4 компанитай хэлцэлд орно. Стратегийн ордыг нэг компани бус олон компани эзэмшиж хуваагдсан. Ховдын Хөшөөтийн уурхайн том ордыг стратегийн ордод оруулаагүй байгаа. Тухайн ордыг 10 компани хуваагаад эзэмшчихсэн байх жишээтэй.   

Стратегийн ач холбогдол бүхий ашигт малтмалын ордыг эзэмшиж байгаа компанитай гэрээ, хэлцэл хийх, эрх зүй бодлогын гээд олон шийдэх ёстой асуудлууд бий.

Тиймээс Засгийн газар Бүрэн эрхт төлөөлөгчийг томилж, стратегийн ач холбогдол бүхий том ордуудын асуудалд онцгой анхаарал хандуулъя гэсэн шийдвэр гаргасан юм болов уу гэж би бодож байгаа.

   Одоогийн байдлаар стратегийн орд эзэмшиж байгаа 6 компани Засгийн газартай хэлцэл хийж 34 , 50 хүртэлх хувиа “Баялгийн сан”-д өгөхөд бэлэн байна гэсэн саналаа ирүүлсэн байгаа. Эдгээр асуудлуудын ард гарахад том баг ажиллаж байна.

Хэвлэл мэдээллээр Ж.Батзанданг сайн муугаар хэлсэн юм зөндөө л байгаа байх. Би тэр болгонд ач холбогдол өгдөггүй. 2019 онд Үндсэн хуульд нэмэлт өөрчлөлт хийснийхээ төлөө намаасаа хөөгдөж байсан. Үндсэн хуульд өөрчлөлт хийсний үр дүнд “Баялгийн сан” бий болсон. Ж.Батзандан гэдэг хүн алсын хараатай, холын бодлого зорилгынхоо төлөө явдаг хүн. Баялгийн сан байгуулахын төлөө сүүлийн 20 жил тэмцэж байна.

2019 онд Үндсэн хуульд нэмэлт өөрчлөлт хийгээгүй бол Баялгийн сан, хуримтлалын сан байгуулагдахгүй байсан. Үүнийг Монголын ард түмэн бүгдээрээ мэдэж байгаа.