<p><em><strong>Энэхүү гарчгийн эзэн нь орон сууц нийтийн аж ахуйн үйлчилгээний салбарын ажилчид. Энгийнээр бол Улаанбаатар хотын иргэдийг цэвэрхэн, тохь тухтай орон сууцанд халуун устай, дулаахан байхад хамгийн чухал нөлөө үзүүлдэг хүмүүс тэд юм. Харамсалтай нь төр засаг, нийгэм нь өөрөө энэ салбарын хүмүүсийг газар доорх шугам хоолойтой нь хамт олон жил тоохгүй орхичихсон. Ажиллах орчин нөхцөл, цалин, нийгмийн хангамжийн асуудал ярихаар ОСНААҮ-ний салбарын хүмүүсийн асуудал хамгийн сүүлд үлддэг. Одоо тэд сард 900 мянгаас 1.3 сая төгрөгийн цалинтай. Тийм ч учраас цалин, нийгмийн асуудлаа шийдүүлэхийн тулд хэдхэн хоногийн өмнө төв талбайд жагсаал хүртэл хийсэн.</strong></em></p> <p>Тэгвэл манай сурвалжлах баг орон сууц, нийтийн аж ахуйн үйлчилгээний ажилчид яг ямар орчинд ажиллаж хөдөлмөрлөдөг юм бэ гэдгийг сурвалжлахаар Орон сууц, нийтийн аж ахуйн удирдах газрын Хэрэглэгчдэд үйлчлэх хоёрдугаар төвийг зорьсон юм. Мягмар гаргийн 08:00 цагт өглөөний шуурхай хурал эхэлж, дарга, инженерүүд нь өмнөх өдрийн ажлаа дүгнэж, ажилчдынхаа өнөөдөр хийх ажлыг чиглүүлж байлаа. Ажлаа хуваарилж, үүрэг, даалгавраа авсан инженер, сантехникийн засварчид хуваарилагдсан байр луугаа явав. </p> <p>Бид тэдний нэг С.Батхангайн нэг өдрийн ажилтай нь танилцсан юм. &nbsp;Тэр 25 настай. Энэ салбарт 4 дэх жилдээ ажиллаж байна. Залуучуудын төлөөлөл ч гэсэн ажилдаа хэдийнэ дасчихсан, хүний арга эвийг олдог, байгууллагын урдаа барьдаг шилдэг ажилчдын нэг аж. Тэрээр Баянзүрх дүүргийн 42-р хорооны 687 өрхтэй Ахмадын хотхоны сантехникийг хариуцдаг. </p> <p>09:00 цагийн үед хуваарилагдсан байрандаа түүнийг ирэхэд, зоорийн давхарт ус алдсан байв. Оршин суугчид сантехникчийг хараад, шууд дуудлаа. Шугамаар урсах усыг хаагаад, ус алдсан айлд очтол 7&#8230; тоотод хүн байсангүй.</p> <figure class="wp-block-image size-large"><img loading="lazy" decoding="async" width="1024" height="682" src="https://admin.time.mn/wp-content/uploads/2025/02/1cf7dca4-defd-4945-9b14-e0c3ddf36d00-1024x682.jpg" alt="" class="wp-image-81429" srcset="https://admin.time.mn/wp-content/uploads/2025/02/1cf7dca4-defd-4945-9b14-e0c3ddf36d00-1024x682.jpg 1024w, https://admin.time.mn/wp-content/uploads/2025/02/1cf7dca4-defd-4945-9b14-e0c3ddf36d00-300x200.jpg 300w, https://admin.time.mn/wp-content/uploads/2025/02/1cf7dca4-defd-4945-9b14-e0c3ddf36d00-768x512.jpg 768w, https://admin.time.mn/wp-content/uploads/2025/02/1cf7dca4-defd-4945-9b14-e0c3ddf36d00-1536x1024.jpg 1536w, https://admin.time.mn/wp-content/uploads/2025/02/1cf7dca4-defd-4945-9b14-e0c3ddf36d00.jpg 2000w" sizes="auto, (max-width: 1024px) 100vw, 1024px" /></figure> <p>Уг айлын утасны дугаарыг олж холбогдоход “Өглөө гарахад ус хаасан байсан. Манайхаас ус алдаагүй. Доод айлаас ус алдсан байх”&#8230; гэх зэргээр ярьсаар 12 цагийн үед ирэхээр болов. Яг энэ үед цаг 09:30 болж байлаа. Тэгэхээр 02:30 цаг хүлээх шаардлагатай болов. </p> <p>Энэ хооронд доод давхрын 7&#8230; тоот айлын хаалгыг тогшвол мөн л хүн байсангүй. Яг ийм яаралтай, чухал үед тухайн айл эзгүй байх нь хугацаа их алдаж, олон айл руу ус орох эрсдэл дагуулдаг аж. Зарим хүн &#8220;Одоо очлоо&#8221; гэсээр ажлын цаг дууссаны дараа 19, 20 цагийн үед &#8220;Би одоо гэртээ ирчихлээ&#8221; гэж утасддаг байна.</p> <blockquote class="wp-block-quote is-layout-flow wp-block-quote-is-layout-flow"> <p><strong>Дуудлага өгөөд 5 минутын дараа ирэх ёстой гэж ойлгодог</strong></p> </blockquote> <p>Зарим хүн дуудлага өгснөөс хойш 5 минутын дотор сантехникч ирэх ёстой юм шиг бухимдаж, уцаарладаг аж. Энэ нь бараг хэвийн үзэгдэл гэнэ. Сантехникч хаана, хэзээ, ямар айлд ус алдахыг мэдэхгүй учир гадаа нь хүлээгээд суухгүй нь тодорхой. Үргэлж дуудлагын дагуу очиж, гэмтлийг засан, айлаас айлын хооронд алхдаг. Нэг айлын засварыг 2 цагийн дотор хийх ёстой. Үүн дээр Улаанбаатар хотын түгжрэл нөлөөлж, ачааллыг улам нэмнэ. </p> <p>Оршин суугчдаас &#8220;Халуун ус тасарсан&#8221;, &#8220;Паар халахгүй байна&#8221;, &#8220;Дундын шугам цоорсон&#8221;, &#8220;Ариун цэврийн суултуур, гал тогооны хоолой бөглөрсөн&#8221; зэрэг дуудлага ихэвчлэн ирдэг. Нэг засварчинд дунджаар 600 өрх оногддог. Үйлчлүүлэгч нарын дунд сайхан зантай, муухай ааштай янз бүрийн хүн бий. Тэдний ажлыг ойлгодгоосоо илүү ойлгодоггүй хүн олон. Өмссөн хувцас, гадна төрхөөр нь тэднийг дүгнэж, үл тоон, дорд үздэг хүн ч бишгүй олон аж. Бүр нулимж хөөх хүн ч таардаг байна.</p> <figure class="wp-block-image size-large"><img loading="lazy" decoding="async" width="1024" height="682" src="https://admin.time.mn/wp-content/uploads/2025/02/e6b6bd3b-651a-44bf-a283-e9b63bed8387-1024x682.jpg" alt="" class="wp-image-81430" srcset="https://admin.time.mn/wp-content/uploads/2025/02/e6b6bd3b-651a-44bf-a283-e9b63bed8387-1024x682.jpg 1024w, https://admin.time.mn/wp-content/uploads/2025/02/e6b6bd3b-651a-44bf-a283-e9b63bed8387-300x200.jpg 300w, https://admin.time.mn/wp-content/uploads/2025/02/e6b6bd3b-651a-44bf-a283-e9b63bed8387-768x512.jpg 768w, https://admin.time.mn/wp-content/uploads/2025/02/e6b6bd3b-651a-44bf-a283-e9b63bed8387-1536x1024.jpg 1536w, https://admin.time.mn/wp-content/uploads/2025/02/e6b6bd3b-651a-44bf-a283-e9b63bed8387.jpg 2000w" sizes="auto, (max-width: 1024px) 100vw, 1024px" /></figure> <blockquote class="wp-block-quote is-layout-flow wp-block-quote-is-layout-flow"> <p>Өмссөн хувцас, гадна төрхөөр нь тэднийг дүгнэж, дорд үздэг хүн бишгүй олон </p> </blockquote> <p>Бид сурвалжилгынхаа үеэр сантехникийн засварчин С.Батхангайг дагаж, хэд хэдэн айлаар оров. Зарим айл үнэхээр тэдний ажлыг ойлгож, хүндэлж эелдгээр харьцсан бол зарим нь үнэхээр үл тоох хандлага гаргалаа. Үүнийг бид өөрсдийн биеэр мэдрэв. </p> <p>С.Батхангай 10-12 цагийн хооронд 4 айлаар орж, засвар хийв. Нэг айлд сантехникийн засвар хийгээд гарахад үнэхээр хувцас бохир болдог аж. Энэ хувцсаа сольё гэсэн ч дараагийн айл хүлээж байгаа учраас бохирдсон хувцсаа солих, норсон хувцсаа хатаах зав түүнд байхгүй. Тиймээс гуталдаа улавч өмсөөд, айлуудаар орохоос өөр аргагүй. Түүний зорилго нь бохир хувцастайгаа айлд орж завааруулах биш, айлын эвдэрсэн шугам хоолой, бөглөрсөн бөглөөсийг гаргаж засах юм. Тэгэхээр ажлаа л нэгдүгээр тавина. Бохир хувцастай ч гэсэн цагаахан сэтгэлтэй эгэл баатруудын нэг нь тэр байв.</p> <blockquote class="wp-block-quote is-layout-flow wp-block-quote-is-layout-flow"> <p><strong>“Баярлалаа” гэсэн үг сонсох хамгийн сайхан</strong></p> </blockquote> <p>С.Батхангай ам бүл дөрвүүлээ. Хоёр хүүхэд, эхнэрийн хамт амьдардаг. Хүүхдүүд нь бага учраас эхнэр нь хүүхдүүдээ харан, ар дааж үлддэг гэнэ. Тэр залуу хүн учраас хүмүүсийн бохирыг цэвэрлэсний төлөө бусдад зэмлүүлж, шантрах үе гардаг. Гэхдээ ажилдаа дуртай, гэр бүлээ тэжээж байгаа учраас ажлаа хийж дуусаад үйлчлүүлэгч нараас “Баярлалаа” гэсэн үг сонсох хамгийн сайхан байдаг аж.</p> <figure class="wp-block-image size-large"><img loading="lazy" decoding="async" width="1024" height="682" src="https://admin.time.mn/wp-content/uploads/2025/02/5ecef568-d08a-4843-96f0-295df1996625-1024x682.jpg" alt="" class="wp-image-81431" srcset="https://admin.time.mn/wp-content/uploads/2025/02/5ecef568-d08a-4843-96f0-295df1996625-1024x682.jpg 1024w, https://admin.time.mn/wp-content/uploads/2025/02/5ecef568-d08a-4843-96f0-295df1996625-300x200.jpg 300w, https://admin.time.mn/wp-content/uploads/2025/02/5ecef568-d08a-4843-96f0-295df1996625-768x512.jpg 768w, https://admin.time.mn/wp-content/uploads/2025/02/5ecef568-d08a-4843-96f0-295df1996625-1536x1024.jpg 1536w, https://admin.time.mn/wp-content/uploads/2025/02/5ecef568-d08a-4843-96f0-295df1996625.jpg 2000w" sizes="auto, (max-width: 1024px) 100vw, 1024px" /></figure> <p>Тэд 12:30-13:30 цагийн хооронд хоолондоо ордог. Байгууллагаас ажилчдын хоолыг үнэгүй өгдөг ч ажлын ачааллаас шалтгаалж, төв оффис руу очиж чаддаггүй. Тиймээс заваараа ойр зуурын гуанз, дэлгүүрээс ширхгийн хоол идэх үе бишгүй гарна. Яаралтай дуудлага ирвэл хоолоо орхиод гарах үе олон бий.</p> <blockquote class="wp-block-quote is-layout-flow wp-block-quote-is-layout-flow"> <p><strong>Хоолойд гацсан бохируудыг гараараа ухаж гаргадаг</strong></p> </blockquote> <p>2005 онд ашиглалтад орсон байрны Канал шугам хоолойг засахаар 14 цагийн үед оров. Үүнийг хүн болгон мэддэггүй, хүн бүр ийшээ ороод байдаггүй. Уг хоолой руу ороход, үнэхээр төсөөлөөгүй нөхцөл угтав. Булан бүрд аалзны тор татсан, нарийн, харанхуй хоолойгоор сантехникийн ажилчид хагас суугаа байдлаар явж, засвар хийдэг. Олны ярьдгаар газар доорх хотын нэг хэсэг гэж үүнийг хэлж болно. </p> <p>Айлуудаас гарч буй бүх бохир энэ хоолойгоор дамжина. Тэгэх замдаа бөглөрдөг аж. Бөглөрсөн бохирыг сантехникчид гараараа ухаж гаргадаг. Шугам нь ихэвчлэн бүдүүн төмөр хоолой харагдав. Энэ хоолойнуудыг олон жил ашигласан, ашиглалтаас гарсан аж. Ийм хоолойнуудыг солихгүй бол ойр ойрхон бөглөрдөг, цоордог юм байна. Тиймээс сүүлийн үед сантехникийн PVC буюу хуванцар хоолойгоор шинэчилж байгаа ч аж ахуйн нэгж, оршин суугчид “Манай хоолой гэмтээгүй. Зүгээр байгаа. Та нарт хамаагүй” гэх зэргээр эсэргүүцдэг байна. Үнэн хэрэгтээ газар доорх гол шугам нь өнөө маргаашгүй задрах дөхжээ. Үүнийг яаралтай солихгүй бол байраараа, цаашлаад хотоороо халаалтгүй, халуун усгүй болох эрсдэл өндөр.</p> <figure class="wp-block-image size-large"><img loading="lazy" decoding="async" width="1024" height="682" src="https://admin.time.mn/wp-content/uploads/2025/02/bc5acc65-9835-4a0e-9189-af30e6c66af6-1024x682.jpg" alt="" class="wp-image-81432" srcset="https://admin.time.mn/wp-content/uploads/2025/02/bc5acc65-9835-4a0e-9189-af30e6c66af6-1024x682.jpg 1024w, https://admin.time.mn/wp-content/uploads/2025/02/bc5acc65-9835-4a0e-9189-af30e6c66af6-300x200.jpg 300w, https://admin.time.mn/wp-content/uploads/2025/02/bc5acc65-9835-4a0e-9189-af30e6c66af6-768x512.jpg 768w, https://admin.time.mn/wp-content/uploads/2025/02/bc5acc65-9835-4a0e-9189-af30e6c66af6-1536x1024.jpg 1536w, https://admin.time.mn/wp-content/uploads/2025/02/bc5acc65-9835-4a0e-9189-af30e6c66af6.jpg 2000w" sizes="auto, (max-width: 1024px) 100vw, 1024px" /></figure> <p>Ийм том эрсдэлд оруулахгүйн тулд ОСНААҮ-ын салбарын 10 мянга гаруй ажилчин ажиллаж байна. Тэд үйлчлүүлэгч нараасаа жаахан ч болов ажлыг нь ойлгож, хүндэлдэг байхыг хүссэн юм.</p>