<p><strong><em>Энэ жилийн Монголын сагсан бөмбөгийн Үндэсний дээд лигийн хүрээнд ард түмний &#8220;</em></strong><strong><em>MVP” </em></strong><strong><em>байсан </em></strong><strong><em>BCH Knights </em></strong><strong><em>багийн тоглогч О.Эрдэнэцогтыг </em></strong><strong><em>TIME.MN </em></strong><strong><em>онцолж байна. Тэрээр улирлын турш онцгойрч, плей-оффын шатанд ч өөрийгөө батлан харуулж эцсийн мөч хүртэл бууж өгөлгүй “давагдашгүй хүчин зүйл”-ийн эсрэг өрсөлдсөн юм. Ийнхүү “Ард түмний MVP” О.Эрдэнэцогтын ярилцлагыг хүлээн авна уу</em></strong><strong><em>?</em></strong></p> <p><strong>-Энэ улирал танай багийн хувьд амаргүй улирал байлаа. Улирал эхлэх дээ л нэрээ сольж дуулиан шуугиантай эхэлсэн. Дуусахдаа хүртэл дурсамжтай өндөрлөлөө. Энэ улирлыг дүгнэвэл ямар улирал байв.</strong></p> <p>Улирал болгон шинэ зүйл ихтэй байдаг. Манай багийн хувьд бүр шинэ зүйл ихтэй улирал байлаа. Амжилтын хувьд санаснаар болоогүй ч алдсан оносон зүйл их байсан. Ямар ч байсан жил болгон лиг маань болно. Нэг баг түрүүлнэ. Бусад багууд нь хасагдана. Миний хувьд бол өөрийнхөө ур чадвар, сэтгэл зүйг тодорхой хэмжээгээр түвшин ахиулсан жил боллоо гэж дүгнэж байна.</p> <p><strong>-Багийн нэр солих мэдээг тамирчид яаж хүлээж авсан.</strong></p> <p>Нэр солигдох асуудал тодорхой хэмжээнд улирал эхлэхээс өмнө тамирчдын чихэнд хүрээд байсан. Гэхдээ би чинь лигт орж ирсэн хоёр дах жилээсээ Гарьд багтайгаа тоглож байсан. Багийн эзнээс ялт ч үгүй шаардлага гэдэг зүйл байсан болохоор олон нийтэд багаас зарлаж чадаагүй ч тамирчид мэдэж байсан болохоор хүндээр тусгаж аваагүй. Хуучин багийн бүх тамирчид &nbsp;байгаа болохоор тэгж их ач холбогдол өгөөгүй. Манай багийн хувьд 3 жил дараалаад плей-оффын эхний шатнаас мултарсан болохоор аварга авах гэсэн том амбицтай байсан. Гэвч эхний шатнаас дахиад л мултарчихлаа. Гэхдээ энэ жилийн алдаанууд дараа жилийн амжилт гаргах гол хүчин зүйл болох байх гэж бодож байна.</p> <figure class="wp-block-image size-large"><img loading="lazy" decoding="async" width="1024" height="576" src="https://admin.time.mn/wp-content/uploads/2025/03/1920X1080-HD-.00_16_37_21.Still100-1024x576.jpg" alt="" class="wp-image-86914" srcset="https://admin.time.mn/wp-content/uploads/2025/03/1920X1080-HD-.00_16_37_21.Still100-1024x576.jpg 1024w, https://admin.time.mn/wp-content/uploads/2025/03/1920X1080-HD-.00_16_37_21.Still100-300x169.jpg 300w, https://admin.time.mn/wp-content/uploads/2025/03/1920X1080-HD-.00_16_37_21.Still100-768x432.jpg 768w, https://admin.time.mn/wp-content/uploads/2025/03/1920X1080-HD-.00_16_37_21.Still100-1536x864.jpg 1536w, https://admin.time.mn/wp-content/uploads/2025/03/1920X1080-HD-.00_16_37_21.Still100.jpg 1920w" sizes="auto, (max-width: 1024px) 100vw, 1024px" /></figure> <blockquote class="wp-block-quote is-layout-flow wp-block-quote-is-layout-flow"> <p>Бэртэл гэмтэл багийн амжилтад маш их нөлөөлсөн</p> </blockquote> <p><strong>-Танай баг Монгол тоглогчдоороо лигийн хамгийн хүчтэй багуудын нэг. Гэтэл сүүлийн жилүүдэд хасагдах шатны эхний босгыг давж чадсангүй. Нэг тийм азгүйдэл дагаад ч байх шиг. Энэ юунд байна вэ</strong></p> <p>Монгол сайн тамирчид маань бэртэл гэмтэл маш их аваад байна. Яг улиралдаа гоё формтой явж байгаад яг дундуур нь хүнд хүнд бэртлүүд аваад тодорхой хугацаанд багтайгаа бэлтгэл хийхгүй. Үүнээс болоод тоглолтод ойлголцлын асуудал үүсэх жишээний. Өнгөрсөн жил гэхэд манайх Хасын хүлэг багийн эсрэг тоглоход цувралын гурав дах тоглолт дээр Э.Дөлгөөн ах маань бэртэл авсан. Энэ мэтчилэн зүйлс багийн амжилт гаргахад гол сөрөг хүчин зүйлс болж байгаа. Энэ жил гэхэд манай багийн Э.Дөлгөөнмөрөн &nbsp;нурууны хүнд гэмтэлтэй байсан. Тэр нь 100 хувь эдгэж явахгүй байсаар улирлаа дуусгасан гэхээр бэртэл гэмтэл манай багийн амжилт, улирлын тоглолтуудад их нөлөөлж байгаа.</p> <p><strong>&#8211;</strong><strong>MVP </strong><strong>шагналын талаар та ямар бодолтой байна. Авчих юм сан гэдэг хүлээлт байсан уу</strong><strong>?</strong></p> <p>Мэдээж боломжтой зүйл дээр яригдаж байгаа юм чинь надаа бол хүлээлт байсан. Гэхдээ яах вэ нэгэнт улирлаа 4-р байраар гаргасан болохоор 1-р гарсан Азаа дүү маань авсан. Мундаг болоод тэр чинь нэгт яваа багаас MVP авсан. Гэхдээ яах вэ хүлээлт байсан ч гэсэн тэрэнд нээх харамсаад авах байсан даа гэж сэтгэл санаагаар унаагүй. Яагаад гэвэл хасагдах шатны чухал үе эхлэх гэж байсан болохоор би илүү тийшээ биш, багтаа хэрэгтэй байсан болохоор гол анхаарлаа тоглолтдоо анхааруулсан.</p> <p><strong>-Плей-оффын цуврал үнэхээр сонирхолтой болсон. Хэдийгээр цуврал 4:1-ээр дууссан ч дурсамжтай цуврал байлаа. Демаркус Казинс Монголд анх удаа ирсэн, Д.Казинсын эсрэг тоглосон анхны баг нь танай баг гээд онцлох зүйл их байна. Түүний эсрэг тоглох ямар байв.</strong></p> <p>Өө мэдээж шал өөр. Олимп, Дэлхийн аварга хүн, NBA-ийн од тоглогч, 211 өндөр 122 кг жинтэй. Үнэхээр давагдашгүй хүчин зүйл шиг санагдсан. Тийм том хүний заслоныг яаж тойрч гархав, яаж өөдөөс нь оролт хийх вэ зэрэгт суралцсан. Маш том туршлага хуримтлуулсан гэж харж байгаа. Зурагтаар харагдаж байгаа шигээ биш юм шиг санагдсан. Илүү сагсан бөмбөгийг ойлгох IQ өндөр, талбайг харах мэдрэмж, талбай дээрх характер нь шал өөр түвшнийх нь гэдэг нь харагдсан. Маш их зүйл суралцсан.</p> <figure class="wp-block-image size-large"><img loading="lazy" decoding="async" width="1024" height="683" src="https://admin.time.mn/wp-content/uploads/2025/03/484557859_1151286750122590_3552208715786920066_n-1024x683.jpg" alt="" class="wp-image-86915" srcset="https://admin.time.mn/wp-content/uploads/2025/03/484557859_1151286750122590_3552208715786920066_n-1024x683.jpg 1024w, https://admin.time.mn/wp-content/uploads/2025/03/484557859_1151286750122590_3552208715786920066_n-300x200.jpg 300w, https://admin.time.mn/wp-content/uploads/2025/03/484557859_1151286750122590_3552208715786920066_n-768x512.jpg 768w, https://admin.time.mn/wp-content/uploads/2025/03/484557859_1151286750122590_3552208715786920066_n-1536x1024.jpg 1536w, https://admin.time.mn/wp-content/uploads/2025/03/484557859_1151286750122590_3552208715786920066_n.jpg 2048w" sizes="auto, (max-width: 1024px) 100vw, 1024px" /></figure> <p><strong>4-р үеийн төгсгөлд Г.Билгүүн амь тэмцсэн хамгаалалт хийнэ шүү. Сүүлийн үе шүү гээд их захиж гарч байгаа харагдсан. Яг талбай дээр та бүгд амь тэмцэж хамгаалж чадсан уу? Их амархан оноо алдаад байгаа харагдсан.</strong><strong></strong></p> <p>Аль аль баг нь амь тавьсан довтолгоо хамгаалалт тулсан. Сүүлд би хоёр холын шидэлт, дараа нь нэг довтолгоо оновчтой болгоод нэг оноо илүү гарсан. Тэгээд жаахан ёндоо дутсан. Яг нэг оноо илүү байхад манайх самбараа авсан бол хожих боломж гарах байсан. Даанч самбараа авч чадаагүй. Бөмбөг эсрэг багт очоод алдаа болоод айл нэг оноо илүү гарсан. Нэг онооны илүү цаг тулсан үед асар их ялгаатай. Гэхдээ л спортод хэрвээ гэж байхгүй. Тэгсэн бол ингэх байсан, ингэсэн бол тэгэх байсан гэхээр муухай. Нэг нь хожоод нэг нь хожигдчихсон юм чинь өрсөлдөгчөө хүндлэхгүй байгаа юм шиг санагддаг.</p> <p><strong>-Тоглолтын онооны харьцаа 84:82, цаг дуусахад 9.4 секунд дутуу байхад танай баг ямар хувилбар зурж гарч ирсэн бэ</strong><strong>? </strong><strong>Мэдээж цувралыг цааш үргэлжлүүлэх үү, улирлаа дуусгах уу гэдэг чухал хариуцлагатай үе байсан шүү дээ.</strong></p> <p>Сүүлийн 9.4 секундэд Пендарвис Виллиамсыг гаргаж ирсэн. Манайх хажуугаас явдаг хувилбараа дуудсан. Би уг нь Пэнниг шидэх байх гэж бодсон. Гэтэл Пенни доошоо залж ороод 2-3 дамжуулалт явчихсан. Тэгээд Ж.Жамсрандорж над руу дамжуулалт өгөхөд би их тухгүй шидсэн. Уг нь чиг яг гоё гарсан. Даанч цагтай уралдаж шидсэн болохоор гараас гарахад л “Заа дутчихлаа л гэж бодогдсон” тэгээд л цаг дууссан даа.</p> <figure class="wp-block-image size-large"><img loading="lazy" decoding="async" width="1024" height="683" src="https://admin.time.mn/wp-content/uploads/2025/03/484348674_1152707753313823_2147497196330665329_n-1024x683.jpg" alt="" class="wp-image-86916" srcset="https://admin.time.mn/wp-content/uploads/2025/03/484348674_1152707753313823_2147497196330665329_n-1024x683.jpg 1024w, https://admin.time.mn/wp-content/uploads/2025/03/484348674_1152707753313823_2147497196330665329_n-300x200.jpg 300w, https://admin.time.mn/wp-content/uploads/2025/03/484348674_1152707753313823_2147497196330665329_n-768x512.jpg 768w, https://admin.time.mn/wp-content/uploads/2025/03/484348674_1152707753313823_2147497196330665329_n-1536x1024.jpg 1536w, https://admin.time.mn/wp-content/uploads/2025/03/484348674_1152707753313823_2147497196330665329_n.jpg 2048w" sizes="auto, (max-width: 1024px) 100vw, 1024px" /></figure> <p><strong>-Цаг дуусаад цувралд “</strong><strong>Selenge Bodons” </strong><strong>баг ялалт байгуулж хагас шигшээд шалгарсан. Тоглолтын төгсөлд таны сэтгэл хөдлөл нэлээн хөдөлж харагдсан. Яг юу бодогдсон бэ</strong><strong>?</strong><strong></strong></p> <p>Хожих боломж байсан тоглолтдоо хожигдсон болохоор шар их хөдөлсөн. Дээрээс нь гайгүй сайн формтой байсан улирал маань дуусчихсан болохоор олон зүйл давхцаад улирлын турш тэвчиж байсан юм аа гаргачихсан. Анх удаа сагсан бөмбөгийн талбай дээр нулимс гаргаж үзсэн.</p> <p><strong>-Демаркус Казинс тоглолтын дараа танд хандаж үг хэлсэн. Юу гэж хэлсэн бэ</strong><strong>? </strong><strong>Ямар санагдсан.</strong></p> <p>Тэр нууц. /Инээв/ гэхдээ гоё урам авсан. Дэлхийн хэмжээний тоглогч надад хандаж үг хэлнэ гэдэг хүндэлмээр байсан.</p> <p><strong>-Танай багийн хожигдлын шалтгааныг дасгалжуулагчийн буруу шийдвэр тоглолтыг эргүүлчихлээ гэж танай багийн хөгжөөн дэмжигчид болон сагсан бөмбөг сонирхогчид их шүүмжилсэн. Жишээ нь тоглолтын төгсгөлд хамгаалалт дээр Ж.Жамсрандорж сул тал болсон уу</strong><strong>?</strong></p> <p>Манайх оноо авахаар буцаад О.Тулга дараалаад оноо аваад байсан. Тэгээд яах вэ? Аль давуу тал юугаараа илүү түүгээрээ илүү гэдэг шиг л тоглолтууд явагдсан. Түүнээс “Жаамаагаа би сул тал болсон” гэж хэлэхгүй. Хожигдвол баг хожигдоно. Хожвол баг хожно. Бас бид нарын буруу байсан. Бид нар заавал тулсан хамгаалалт хийх ёстой байсан. Тэрийгээ хийж чадаагүй тийм асуудлууд байгаа.</p> <p><strong>Ярилцсанд баярлалаа. Ирэх улиралд нь амжилт хүсье.</strong></p> <p><strong>Баярлалаа. Баяртай. </strong></p>