Улсын хэмжээнд хүүхдэд хэрэглэж буй эм, тарианд хүнд металл байгаа эсэхийг тусгай зориулалтын аппаратаар хэмждэг. Гэтэл уг аппарат нь 2024 оны 10-р сараас хойш буюу 5 сарын хугацаанд огт ажиллахгүй байгаа аж. Ингэснээр эмнэлэгт хэвтэн эмчлүүлж байгаа хүүхдүүдэд тарьдаг эм тариан дотор хүнд металлын агууламж байгаа эсэхийг шалгах боломжгүй болжээ. Иймд уг тоног төхөөрөмжийг яаралтай ашиглалтад оруулж шинжилгээгээ авах ёстойг УИХ-ын гишүүн Ж.Чинбүрэн холбогдох эмнэлгийн удирдлагуудад санууллаа.
УИХ-ын гишүүн Ж.Чинбүрэн: Ялангуяа хүүхдийн эмчилгээнд хэрэглэдэг бүтээгдэхүүн дотор хүнд металл байх ёсгүй. Энэ нь хүүхдэд хэрэглэдэг эм, тарианд хүнд метал байна уу, эсвэл хэмжээндээ байна уу гэдгийг үздэг чухал аппарат. Үүнийг Монгол Улсад хийж чадахгүй байна. Монголын зах зээл дээр байгаа эмийг чанартай байлгах хүсэл эрмэлзэл байхгүй байна гэв.
Эмийн хяналтын лабораторийн мэргэжилтэн: “Уг аппарат нь зөвхөн хүүхдийн бүтээгдэхүүнд хүнд металлын шинжилгээ хийхээс гадна, эмийн бүтээгдэхүүнд хүнд металлын шинжилгээ, тарилгын шингэнд натри, кали, кальци, эрүүл мэндийн бүтээгдэхүүнд эрдсийн шинжилгээ хийдэг. Харамсалтай нь энэ төрлийн шинжилгээ 2023 оноос хойш улсын хэмжээнд хийгдэхгүй байгаа” гэв.
Хуучин аппарат нь 2 жилийн өмнө буюу 2023 онд эвдэрчээ. Улмаар шинээр төсөвтөө суулгаж, тендерээр шинэ аппарат авсан ч сүүлийн 5 сарын турш огт ажиллахгүй байгаа юм байна. Уг аппаратыг 2024 оны 10-р сард “Эм Ди Эспек” ХХК нийлүүлж байжээ.