Боловсролын ерөнхий газар, Авлигатай тэмцэх газар болон өмгөөллийн “Алтаргана хуулийн товчоо” хуулийн фирм хамтран ирэх сарын 5-нд “MOCK TRIAL 2025” эрүүгийн хэргийн мэтгэлцээний тэмцээн зохион байгуулахаар болжээ.  Мэтгэлцээний зорилго нь иргэдийн хууль эрх зүйн орчны мэдлэгийг сайжруулах аж. 

“Алтаргана хуулийн товчоо” хуулийн фирмийн захирал Б.Агар-Эрдэнэ: Монгол Улсын хэмжээнд хүчин төгөлдөр мөрдөж байгаа хууль тогтоомж, шүүхийн шийдвэртэй холбоотойгоор иргэдийн зүгээс тодорхой чиглэлд санал шүүмжлэл байнга ирдэг. Тухайн санал шүүмжлэл нь харилцан адилгүй бөгөөд өөр нөхцөл байдалтай уялдаж тухайн шүүхийн шийдвэрт хандах ард иргэдийн эрхзүйн ухамсар ямар түвшинд байгааг харуулдаг.  Иргэдийн эрхзүйн ухамсар болон шүүхийн шийдвэрийн биелэлттэй холбоотойгоор ойлголтын зөрүү, зөрчилдөөн үүсдэг” гэв.

Уг тэмцээнд хууль зүйн их дээд сургуулийн оюутан залуучууд оролцоно. Мэтгэлцээн нь яллах ба өмгөөлөх гэсэн хоёр талын хооронд болох юм байна.  Тэмцээн 2025 оны дөрөвдүгээр сарын 5-ны өдөр Нийслэлийн Захиргааны хэргийн давж заалдах шатны шүүхийн танхимд болох юм.