Хүний эд эрхтэнг зөвшөөрөлгүй авсан хэрэгт холбогдож, анхан шатны шүүхээс 2.6 жилийн ял авсан П.Батчулуун эмчийн биеийн байдал хүнд, хорих ангиас сүрьеэ туссан гэх агуулгатай мэдээлэл зарим хэвлэл мэдээллийн хэрэгслээр цацагдсан. Тэгвэл үүнтэй холбоотой Шүүхийн шийдвэр гүйцэтгэх ерөнхий газраас албан ёсны мэдэгдэл гаргажээ.

Тус мэдэгдэлд, 2025 оны гуравдугаар сарын 25-25-ны өдрүүдэд зарим хэвлэл мэдээллийн хэрэгсэл “П.Батчулуун эмч цагдан хорих 461 дүгээр  ангид байхдаа сүрьеэ туссан, биеийн байдал хүнд стресс ихтэй байгаа гэх мэдээллийг нийтэлсэн нь бодит бус, ташаа болохыг албан ёсоор мэдэгдэж байна” гэжээ.

Энэхүү мэдээлэл нь байгууллагын хэвийн үйл ажиллагаа, албаны нэр хүндэд сөргөөр нөлөөлөхийн зэрэгцээ хоригдогч, тэдний ар гэрийнхэнд эргэлзээ төрүүлж, сэтгэл зүйн тогтворгүй байдлыг бий болгож байна.

П.Батчулууны эрүүл мэндийн байдал нь хүний хувийн мэдээлэл хамгаалах тухай хуулийн 4 дүгээр зүйлийн 1.12 дахь хэсэгт заасан “хүний эмзэг мэдээлэл” тул хуулиар хамгаалагдсан эрхэд нь хүндэтгэлтэй хандахыг хүсье” гэжээ.