Дэлхийд хамгийн олон үзэгчтэй топ спортын нэг бол хөлбөмбөг билээ. Нэгэн цагт Хөлбөмбөгийн холбооны ногоон талбайд үзэгч олон бултаараа цуглаж, шигшээ багаа уухайлан дэмждэг байв. Гэтэл сүүлийн үед хөлбөмбөгийн ногоон талбайд хөгжөөн дэмжигч гэх гялтайх хүн харагдахгүй болов. Тэр байтугай хөлбөмбөгчдийн зориг мохож, шударга бус байдалтай эвлэрэхгүй гэдгээ зоригтой илэрхийлж, Монголын хөлбөмбөгийн холбоогоо аврах хөдөлгөөн эхлүүлсэн.
Энэ бүхний учир болбоос жил бүр Олон улс, Азийн хөлбөмбөгийн холбооноос санхүүжилт авдаг Монголын хөлбөмбөгийн холбооны үйл ажиллагаа доголдсонтой холбоотой. Санхүү, менежмент, удирдлагын бүтцээс гадна хөрөнгө мөнгөө захиран зарцуулах, санхүүгийн тайлангийн тал дээр асуудалд орж, ерөнхийдөө Хөлбөмбөгийн холбооны чадамж “Сэхээнд” орчхоод байна.
Тус холбооны ерөнхийлөгчөөр ажиллаж байсан М.Болд үүрэгт ажлаа өөрийн хүсэлтээр өгч чөлөөлөгдсөн. Мөн нэгдүгээр сарын сүүлчээр МХХ-ны Гүйцэтгэх зөвлөлийн ээлжит бус хурал болж, ерөнхий нарийн бичгийн дарга Т.Дагвадоржийг үүрэгт ажлаас нь чөлөөлсөн бол дэд нарийн бичгийн дарга, Гадаад харилцааны хэлтсийн дарга, Санхүүгийн албаны дарга С.Монголжингоо өөрийн хүсэлтээр ажлаа өгсөн юм.
Ийн ерөнхийлөгч, ерөнхий нарийн бичгийн дарга, Гадаад харилцааны хэлтэс, Санхүүгийн албаны дарга нь ажлаа өгсөн ч асуудал намжсангүй, ассан гал унтарсангүй. Шинэ ерөнхий нарийн бичгийн даргаар М.Ганбаатар очсон ч холбооны үйл ажиллагаа сэргэсэнгүй.
Тэгвэл ирэх дөрөвдүгээр сарын 29-ний өдөр тус холбоо ерөнхийлөгчийнхөө нөхөн сонгуулийг хийхээр товлож, нэр дэвшигчдийн материалыг гуравдугаар сарын 29-ний 18:00 цаг хүртэл хүлээн авч байна. Тус холбооны шинэ ерөнхийлөгчөөр хэн сонгогдох вэ гэсэн асуулт олны анхаарлыг татаад байна. Нэр дэвшигчид эхнээсээ тодорсон бөгөөд улс төрийн салбараас эхлээд, олны танил эрхмүүд энэ суудалд горилж байна.
Ингээд та бүхэнд Хөлбөмбөгийн холбооны ерөнхийлөгчийн сонгуульд өрсөлдөж буй нэр дэвшигчдийг танилцуулъя.
- С.Жаргал
Тэрээр Монголын спортын корпорацын спорт хариуцсан захирал. С.Жаргал 2013 оноос хойш Азийн хөлбөмбөгийн холбооны бүх тэмцээн төдийгүй ОУХБХ-ны Клубүүдийн ДАШТ-ийг зохион байгуулж байсан туршлагатай. Польш болон Ирланд улсад хүнсний технологи, олон улсын бизнес-менежмент, төслийн менежментээр суралцан төгсөөд, Хүмүүнлэгийн ухааны их сургуульд олон улсын харилцааны бакалавр, Сөүлийн их сургуульд спортын менежментийн магистрын зэрэг хамгаалжээ.
- Г.Дашням
“Jet sharing Mongolia” ХХК-ийн захирал Г.Дашням Хөлбөмбөгийн холбооны ерөнхийлөгчийн сонгуульд өрсөлдөхөө цахим хаягаараа зарласан. Тэрээр 2016 онд “Улаанбаатар сити” багийг үүсгэн байгуулж, 2019-2020 онд МХБХ-ны дэд ерөнхийлөгчөөр ажиллаж байв.
“Хөлбөмбөгийн холбоог тойрсон бусармаг явдал, шударга бус зүйлстэй анхнаасаа эвлэрч байгаагүй. Их спортыг амьжиргааны суваг болгож, хувийн ашиг сонирхлоор хандах шаардлага, сонирхол, хүмүүжил надад байхгүй. Хөлбөмбөгт хайртай хүн бүртэй зүрх, сэтгэл нэгдэж, тууштай зүтгэх болно” гэж тэр мэдэгдлээ.
- Ц.Анандбазар
УИХ-ын гишүүн асан Ц.Анандбазар нэр дэвшихээр материалаа өгсөн гэх албан бус мэдээлэл байна.
Монголын хөлбөмбөгийн холбоог улс төр, бизнесийн хүмүүс удирдаж байсан. Тэгвэл ужгирсан асуудлыг цэгцэлж, мөнгө санхүүтэй холбоотой асуудлыг нэг талд нь шийдэж, тамирчдын эрх ашгийг хамгаалж, шигшээ багийн амжилт, лигийн зохион байгуулалт, шагналын сан гээд энэ холбоог тойрсон чухал асуудлуудыг шийдэж чадах хүн хэн байх вэ? Ердөө нэг хоногийн дараа нэр дэвшигчдийн материалыг хүлээн авч дуусна. Харин ирэх 4 дүгээр сард бид Монголын хөлбөмбөгийн холбоог удирдах шинэ ерөнхийлөгчийг харах нь.