Хөгжлийн банкны хэргийг гурван шатны шүүхээр хэлэлцэж, шийдвэр нь эцэслэгдээд буй. Энэ дагуу шүүхээс торгох ял сонссон УИХ-ын гишүүн Даваагийн Цогтбаатарын бүрэн эрхийн асуудал хөндөгдөөд байгаа билээ. Тэрээр Улсын дээд шүүхэд хандаад байгаа юм.
Тэгвэл энэ талаар УИХ дахь Ардчилсан намын бүлгийн дарга О.Цогтгэрэлээс тодруулав.
– 126 гишүүнтэй парламент ёс зүйн хувьд асуудалтай юу. Тухайлбал танай намаас нэр дэвшсэн Ц.Мөнхтуяа гишүүн олон нийтийн цахим сүлжээгээр хүмүүстэй харилцаж буй хандлага шүүмжлэлд өртөөд байгаа шүү дээ.
УИХ-ын гишүүн гэдэг чинь хууль тогтоогчоос гадна ард иргэдийн л төлөөлөл шүү дээ. 126 гишүүн дотор өндөг шиг өөгүй, нэг хэвэнд цутгасан хүмүүс байхгүй байлгүй дээ. Зан характерыг дүгнэсэн гэж би мэдэхгүй. Хууль зөрчсөн зөрчөөгүй гэдэг дээр л ярих ёстой байх гэж бодож байна.
– Ардчилсан намын нэр нүүртэй холбоотой асуудал шүү дээ. Намын дүрэмд заасны дагуу Ц.Мөнхтуяа, Д.Цогтбаатар нарын гишүүдийн асуудлыг ёс зүйн хороогоор авч хэлэлцэх шаардлагатай гэсэн шахаасууд намын гишүүдээс ирж байгаа юу?
Нам хяналтын байгууллага, бусад нэгжүүдтэй болохоор шаардлагатай бол нам дээр асуудлуудаа яриад явах байх. Одоогоор тийм түвшний асуудал яригдаагүй байна. Би нарийн мэдээлэлгүй байна.
– Урд нь гэмт хэрэгт холбогдсон нь шүүхээр тогтоогдсон бол танай намын дүрмэнд 5 хоногийн дотор тухайн гишүүнийхээ асуудлыг авч хэлэлцэнэ гэж заасан байдаг.
Д.Цогтбаатар гишүүний асуудал жоохон төвөгтэй. УИХ-ын гишүүний халдашгүй, бүрэн эрхт байдал байдаг. Үүнийг шүүхийн байгууллага яагаад харгалзаж үзээгүй юм гээд олон асуулт, асуудлууд байгаа юм билээ. Д.Цогтбаатар гишүүн тухайн албан тушаал дээр байхдаа хувийн байдлаар ямарваа нэгэн харилцаа үүсгэж, ашиг сонирхолын зөрчилтэй авлига авсан асуудал огт байхгүй. Банканд жижиг албан тушаалтай байсан. Дарга цэргийнхээ зөвшөөрөлгүйгээр даалгавар хийгээд явдаггүй байх. Үүний цаана улс төрийн учир шалтгаан байна уу? Ардчилсан намын нэг гишүүнийг хасах, танах зүйл байна уу гэдгийг бид нар сайн мэдэхгүй байна. Гэхдээ бид дээд шүүхийн тогтоол, шийдвэрийг шүүн цэгнэж, буруу зөвийг нь хэлэлцэх эрх байхгүй.