“Эрхтэн шилжүүлэн суулгуулагсдын холбоо”ТББ-аас цаг үеийн асуудлаар мэдээлэл хийлээ. Тэд бүгд П.Батчулуун эмчийг суллахыг шаардаж өөрсдийн байр суурийг илэрхийллээ. Донорын тухай хуулийн нэн яаралтай сайжруулахыг УИХ-ын гишүүдээс хүслээ.
Эрхтэн шилжүүлэн суулгуулагсдын холбоо” ТББ-ын ТУЗ-ийн дарга М.Өлзийбаяр: Яагаад жилээс жилд элэг, бөөр зэрэг эрхтэн шилжүүлэн суулгах шаардлагатай хүмүүсийн тоо нэмэгдээд байгаа талаар тоон мэдээллийг эхлээд өгье. “ 2023 онд дэлхий даяар нийт 172.400 эрхтэн шилжүүлэн суулгах мэс засал хийгдсэний 70 хувь нь бөөр, 20 хувь нь элэг, үлдсэн хувьд зүрх гэх мэт эрхтнүүд байна. Манай дэлхийн 8 тэрбум хүний 850 сая гаруй нь бөөрний ямар нэг өвчтэй. Эдгээрээс 6 сая гаруй нь бөөр орлох эмчилгээнд орж байгаа гэсэн тоо баримт байна.
Манай улсын хувьд 2006 онд байнгын диализ эмчилгээ эхлэхэд 40 гаруйхан хүн байсан. 2020 онд энэ тоо 1200 болсон бол 2025 онд 2980 болчихоод байна. Эдгээрийн 695 нь бөөр хүлээх жагсаалтад, 400 гаруй хүн элэг хүлээх жагсаалтад байна. Энэ хэрээр эрхтэн шилжүүлэх эмчилгээ шаардлагатай байгаа гэсэн үг. Тиймээс ч 2007 онд 70 байсан элэг, бөөр шилжүүлэн суулгуулсан хүний тоо 1200 дөхсөн. Эндээс зөвхөн Монголдоо шилжүүлэн суулгах мэс засал хийлгэсэн нь 900 орчим байна. Эрхтэн шилжүүлэн суулгах эмчилгээ манай улсад 1996 оноос хийгдэж эхэлсэн. Маш олон салбарын 30 жилийн хөдөлмөрийг үгүйсгэмээргүй байна гэдгийг онцолж хэлмээр байна ” гэв.
Эрхтэн шилжүүлэн суулгуулагсдын холбоог үүсгэн байгуулагч М.Батболд: Нас барсан хүн бүр донор болох мэтээр буруу ойлгоод байна. Тархины үхжилтэй, цусны бүлэг таарсан гэх мэт шалгуурууд бий. Манай улсад хуулийг дутуу боловсруулсан тул өнөөдөр бид энэ асуудлаар хоёр хуваагдав. Харин өндөр хөгжилтэй орнуудад жолооч болоход нь “Та донор болох уу” гэж асуудаг юм байна.
Иргэн 18 нас хүрэнгүүт мөн энэ асуултыг асуудаг хуультай улс ч бий. Эдгээр улсад донор их тул өвчтөнүүд нь донороо удаан хүлээдэггүй юм байна.
Монголчууд буян хийхийг эрхэмлэн дээдэлдэг ард түмэн шүү дээ. Талийгчийнхаа араас бид ямар их буян хийдэг билээ. Гандантэгчинлэн хийдийн их хамба асан Чойжамц донор болох нь хамгийн том буян гэсэн шүү дээ. Өвчин хэлж биш, хийсэж ирдэг тул хэнд ч донорын эрэлт хэрэгцээ гэнэт үүсэж болзошгүй гэв.