“Реал Мадрид” клубийн супер од Килиан Мбаппе бүх цаг үеийн мэргэн бууч Кристиан Роналдотой адил клубийнхээ домог болж чадна гэж дасгалжуулагч Карло Анчелотти даваа гарагт хэлжээ. 

Роналдог багаасаа шүтэн биширдэг байсан Мбаппе өнгөрсөн зун “Пари Сен-Жермен”-ээс “Реал”-д шилжин ирсэн эхний улиралдаа Португалын довтлогчийн оруулж байсантай тэнцүү тооны буюу 33 гоол оруулсан байна.

К.Анчелотти хэвлэлийн хурлын үеэр “Роналдогийн “Реал Мадрид”-д байхдаа гаргасан амжилтад Мбаппе хүрч чадна гэж бодож байна гэжээ. Өөрөөр хэлбэл, Кристиан Роналдо шиг “Реал Мадрид”-ын домог болно гэсэн үг гэж тэрбээр тодотгон хэлсэн байна.

Роналдо 2009 онд “Манчестер Юнайтед”-аас “Реал”-д ирж, 2018 онд клубээс явах үедээ нийт 450 гоол оруулсан юм. Өдгөө Саудын Арабын “Аль-Наср” клубт тоглож буй 40 настай тэрээр “Реал Мадрид”-д ирсэн эхний улиралдаа 35 тоглолтод 33 гоол оруулж байжээ.

Харин 26 настай Мбаппе өнгөрсөн бямба гарагт Ла Лигт “Леганес”-тэй тоглохдоо дубль хийж, Роналдогийн амжилттай эн зэрэгцэх нь “онцгой сайхан санагдаж байна” хэмээн сэтгэгдлээ хуваалцсан байна. Мбаппе “Реал Мадрид” телевизэд ярилцлага өгөхдөө, Роналдо “Реал Мадрид”-ын хэн бэ гэдгийг бүгд мэднэ, бид хоёр хоорондоо ярилцаж, тэр надад маш их зөвлөгөө өгдөг гэжээ.

Эх сурвалж: Монцамэ агентлаг