“Ice top” хамтлагийн ахлагч Б.Оргил-Эрдэнэ Малайз улсад нас барсан гэж түүний төрсөн дүү Б.Од-Эрдэнэ энэ сарын 24-ны өдөр өөрийн цахим хуудсаар дамжуулан мэдэгдсэн. Үүнээс хойш хар тамхинаас болж нас барсан, цогцос нь замын хажуугаас олдсон гэх зэргээр олон мэдээлэл хөвөрсөн. Тэгвэл Гадаад харилцааны яамнаас энэ талаар залруулга гаргажээ.

Тодруулбал, “Малайз Улсад амиа алдсан Монгол Улсын иргэн Б.О-ийн амь насаа алдсан шалтгаан тодорхой болоогүй, задлан шинжилгээний хариу гараагүй байна.

Гэтэл сүүлийн өдрүүдэд олон нийтийн хэвлэл мэдээллийн хэрэгсэл болон нийгмийн сүлжээнд тус хэрэг, талийгаачийн амь насаа алдсан шалтгааны талаар үндэслэлгүй, худал ташаа мэдээлэл гарах боллоо.

Монгол Улсын иргэн хилийн чанадад амь насаа алдсан харамсалтай хэргийн талаар худал ташаа мэдээлэл түгээх нь нийгэмд үл ойлголцол, ташаа ойлголт төрүүлж, талийгаачийн ар гэр, ойр тойрныхонд хүндээр тусахаас гадна холбогдох хууль тогтоомжийг зөрчиж болзошгүй анхаарна уу” гэжээ.