<p>Спортын &#8220;Хатан хаан&#8221; хэмээгддэг хөнгөн атлетикийн ДАШТ-ийг хоёр жил тутам зохион байгуулдаг билээ. Тэгвэл энэ жилийн есдүгээр сарын 13-21-нд Японы Токио хотноо 20 дахь удаагийн тэмцээн болно.</p> <p><strong>Хөнгөн атлетикийн ДАШТ нь оролцогч орон, тамирчдын тоо, нэр хүнд , цар хүрээгээрээ спортын ертөнцөд дээгүүр бичигддэг бөгөөд зөвхөн оролцох стандард (entry standard) биелүүлсэн болон Дэлхийн хөнгөн атлетикийн холбооны чансаагаар тодорхой квотод багтсан тамирчид л ордог өндөр босготой тэмцээн юм.</strong></p> <p>&#8220;Токио-2025&#8221; ДАШТ-д манай Монголын тамирчдаас оролцох эрхээ хамгийн түрүүн авсан тамирчин нь Монгол Улсын гавьяат тамирчин , марафонч Бат-Очирын Сэр-Од боллоо.</p> <blockquote class="wp-block-quote is-layout-flow wp-block-quote-is-layout-flow"> <p>&#8220;Токио-2025&#8221; ДАШТ-ий эрэгтэй марафон гүйлтийн төрөлд entry standard нь 2:06:30 бөгөөд мөн Дэлхийн чансаагаар нийт 100 тамирчин оролцох квоттой.</p> </blockquote> <p>Өнөөдөр World athletics буюу Дэлхийн хөнгөнатлетикийн холбооноос ДАШТ-д оролцох тамирчдын нэрсийг жагсаасан бөгөөд эрэгтэй марафон гүйлтийн төрөлд Б.Сэр-Од маань 66-д бичигдэн Токиод &#8221; тоосоо&#8221; өргөх нь тодорхой боллоо.</p> <p>Ирэх 10 дугаар сард 44 нас хүрэх Сэр-Од маань тэсвэр тэвчээр, хатуужлын хязгаар марафон (42 км 195 м) гүйлтээр зургаан олимпод (2004,2008,2012,2016,2020,2024оны Зуны олимпийн наадамд) оролцсон манай гариг дээрх анхны бөгөөд цорын ганц тамирчин&nbsp; гэдгийг бид байтугай дэлхий даяар, хөнгөнатлетикийн ертөнц мэднэ.</p> <p>Түүгээр зогсохгүй марафоны Ази тивийн АШТ-ий алт, мөнгө, Зүүн Азийн наадмын мөнгөн медаль хүртэж, Осака, Брайтон, Хофү марафонд түрүүлж, олон арван марафонд медальт болон шагналт байрт шалгарч байсан &#8220;Ziggy&#8221; хочит Сэр-Од маань хөнгөнатлетикийн ДАШТ-д 11 удаа оролцсон амжилтаараа дэлхийн бүх хөнгөнатлетикчдийн жагсаалтад&nbsp; 13 оролцсон Испанийн Хесус Анхель Гарсия, Португалийн Жоао Виейра нарын дараа л бичигддэг.Гэхдээ тэд бол спорт алхааны тамирчид. Харин марафоноор ДАШТ-д хамгийн олон удаа оролцсон тамирчин нь Монголын Б.Сэр-Од юм. Энэ амжилтаараа Сэр-Од маань Гиннесийн рекорд амжилтын номд бичигдсэн бас.</p> <p>Тэгвэл энэ амжилтаа дахин ахиулж 12 дахь удаагаа ДАШТ-д оролцох боллоо.</p> <p class="has-text-align-right">Ц.Энхтүвшин &#8220;Таван цагариг сонин&#8221;</p>